Qazdatathon байқауына қатысуға 18 команда өтініш білдірді

Деректермен жұмыс істеу жөніндегі Qazdatathon конкурсына қатысу өтінімдерін қабылдау аяқталды.

Жобаның datathon.kz сайтында 13 жоғары оқу орнының магистранттары мен докторанттары тіркелді. Қазақстанның 5 қаласынан барлығы 18 команда жиналды.

Сонымен қатар байқауға 10 ментор өтінім берді, олар іс-шараның соңына дейін командалардың тәлімгері ретінде бірге жұмыс істейді. Конкурс ҚР СЖРА Ұлттық статистика бюросы және ҚР Ұлттық Банкінің төлем және қаржылық технологияларын дамыту орталығымен бірлесіп ұыйымдастырылған.

1 желтоқсанға дейін командалар өз жобаларын синтетикалық деректер негізінде әзірлейді. Қатысушыларға кәсіпорындардың қаржы-шаруашылық қызметі және транзакциялық қызметі бойынша деректер ұсынылған.

Бұдан кейін байқаудың қазылар алқасы іріктеу жүргізіп, ең үздіктері 9 желтоқсанда өтетін байқаудың финалына жолдама алады.

Конкурс жеңімпаздары мен жүлдегерлері демеушілер атынан электроника дүкендеріне сыйлық сертификаттарын, деректерді талдауға арналған «Qlik» бағдарламасының жылдық лицензиясын, бизнес-аналитика бойынша кітаптар, сондай-ақ конкурсты ұйымдастырушылар құрылымында тағылымдамадан өту мүмкіндігін алады.

Сондай-ақ, жеңімпаз командаға нақты деректер негізінде жобаны іске асыру мүмкіндігі беріледі.