XXV қысқы Олимпиада Милан мен Кортина-д'Ампеццода өтеді

Италия тарихта төртінші рет Олимпия ойындарын қабылдайды.  Бұл туралы шешім 2019 жылы 24 маусымда ХОК-тың Лозанна қаласындағы 134 - сессиясында қабылданған.

Милан тұңғыш рет Олимпиаданы өткізеді. Ал Кортина-д’Ампеццода 1956 жылы Олимпия ойындары өткен.

Ойындардың ресми белгілері – Тина және Мило. Оның эскизін мектеп оқушылары әзірлеген. Барлығы 1600 дизайн ұсынысы қабылданған.

XXV қысқы Олимпиадада 16 спорт түрінен 100-ге жуық медаль жиынтығы сарапқа салынады. Бұл спорт түрлеріне биатлон, бобслей, тау шаңғысы, керлинг, конькимен жүгіру спорты, шаңғы жарысы, шаңғы қоссайысы, фристайл, трамплиннен секіру, шана спорты, скелетон, ски-альпинизм, сноуборд, мәнерлеп сырғанау, шайбалы хоккей және шорт-трек кіреді. Олимпия ойындарына алғаш рет ски-альпинизм енгізіледі.

Сайыстар Италияның әртүрлі қалаларыда өтеді. Әр аймақ жарыстарды өткізуге арналған спорт нысандарын ұсынады. Ойын өтетін негізгі орындар мен спорттық жарыстар:

Милан

• «Сан-Сиро» стадионы: Олимпиаданың ашылу салтанаты өтеді.

• «ПалаИталия Санта Джулия»: шайбалы хоккейге арналған негізгі арена.

• «ПалаТруссарди»: шайбалы хоккейдің екінші аренасы.

• Пьяцца-дель-Дуомо: марапаттау рәсімдері мен тікелей көрсетілімдер өтетін алаң.

Кортина-д’Ампеццо

• Эудженио Монти трассасы: бобслей, шана спорты және скелетон жарыстары өтеді. Бұл трасса 1956 жылғы Олимпиадаға арналып салынған, қазіргі уақытта қайта жөндеуден өтуде.

• Олимпиада стадионы: керлинг сайыстары өтетін орын.

Бормио

• Тау шаңғысы трассалары: ерлер арасындағы тау шаңғысы жарыстары осында өтеді.

Антхольц (Антерсельва)

• «Оңтүстік Тироль-Арена»: биатлон кешені, биатлон жарыстары осы жерде ұйымдастырылады.

Вальтеллина

• Ливиньо: сноуборд және фристайл жарыстары өтетін орын.

Валь-ди-Фьемме

• «Джузеппе Даль Бен» стадионы (Предаццо): трамплиннен секіру және шаңғы қоссайысы.

• «Лаго ди Тезеро» стадионы (Тезеро): шаңғы жарысы және шаңғы қоссайысы.

• «Пине» мұз айдыны (Базельга-ди-Пине): конькимен жүгіру спорты. Олимпиада алдында бұл нысанға жөндеу жұмыстары жүргізіледі.

Верона

• Арена ди Верона: тарихи амфитеатрда Олимпиаданың жабылу салтанаты өтеді.

Олимпиада қалашықтары Милан, Ливиньо және Кортина-д’Ампеццода орналасады.