Биыл Петропавлда 53 көшеге асфальт төселеді

Өңір басшысы Ғауез Нұрмұхамбетов облыс орталығындағы Лазутин, Сутюшев, Болатбаев, Зеленая және Алтын дала көшелеріндегі жолдарды жөндеу жұмыстарын тексерді. Биыл Петропавлда 53 көшеге асфальт төсеу жоспарланса, оның 39-да бұрын-соңды асфальт болмаған. 

Бұл көшелер негізінен Жұмысшы кенті, Борки және Орман ықшамауданы сынды қаламыздың шетінде орналасқан. Облыс әкімі атқарылған жұмыстардың сапасын қатаң қадағалап, жаз күндерін тиімді пайдалануды тапсырды.  Жалпы, 5 жыл ішінде Петропавлдағы барлық жолдарды қиыршықтан асфальт төсендісіне ауыстыру жоспарланған.  

"Сондай-ақ, қала басшылығы мен аудандар әкімдеріне қаңырап бос жатқан және қараусыз қалған ғимараттарды ретке келтіруді, меншік иелерімен қажетті жұмыстарды жүргізуді тапсырдым. Облыс орталығында қаланың көркін бұзатын ғимараттар болмауы керек", - деп жазды өңір басшысы әлеуметтік желіде.