Солтүстік Қазақстан облысында балалардың құқықтарын қорғау және отбасыларды қолдау мемлекеттік саясаттың басым бағыты болып қала береді
Солтүстік Қазақстан облысында балалардың құқықтарын қорғау, отбасыларды қолдау және кәмелетке толмағандарға психологиялық көмек көрсету жүйесін дамыту бойынша кешенді шаралар жүзеге асырылуда.
Жұмыстың негізгі бағыттарының бірі – балалар мен жасөспірімдердің психологиялық саулығын сақтау. Өңірде тәулік бойы жұмыс істейтін Психологиялық қолдау орталығы қызмет көрсетуде. Орталық ашылғаннан бері оның көмегіне білім беру процесінің 31 мыңнан астам қатысушысы жүгінген.
Мамандардың айтуынша, тәуекел тобына негізінен толық емес отбасыларда тәрбиеленетін, жанжалға толы ортада өмір сүретін және эмоционалдық қолдау жетіспейтін жасөспірімдер жатады. Осыған байланысты мәселелерді ерте анықтауға және балалар мен олардың ата-аналарына уақытылы көмек көрсетуге ерекше көңіл бөлінуде.
2025 жылы Петропавл қаласында өмірлік қиын жағдайға тап болған балаларға қолдау көрсететін Кәмелетке толмағандарды бейімдеу орталығы ашылды. Сонымен қатар, 2025 жылдан бастап облыстың барлық аудандары мен Петропавл қаласында әлеуметтік, психологиялық және құқықтық көмек көрсететін Отбасын қолдау орталықтары жұмыс істейді.
Жетім балалар мен ата-анасының қамқорлығынсыз қалған балалардың құқықтарын қорғау мәселесіне ерекше назар аударылуда. Қазіргі уақытта облыста осы санаттағы 1053 бала тұрады. Оның 67 пайызы отбасыларда тәрбиеленуде. Бұл отбасылық тәрбие нысандарын дамыту бағытындағы жүйелі жұмыстың нәтижесін көрсетеді.
Өңірде үш Балаларды қолдау орталығы, Кәмелетке толмағандарды бейімдеу орталығы, отбасылық үлгідегі балалар ауылы және екі Жастар үйі жұмыс істейді. Жетім балалар мен ата-анасының қамқорлығынсыз қалған балаларға арналған тоғыз ұйымда 314 бала тәрбиеленуде.
Балалардың құқықтарын қорғаудың тиімді тетіктерінің бірі – оларды қабылдаушы және патронаттық отбасыларға орналастыру немесе қорғаншылыққа беру. Бүгінде 699 бала отбасыларға берілген. Барлық қабылдаушы отбасылар қорғаншылық және қамқоршылық органдарының тұрақты бақылауында.
Өңірде профилактикалық жобаларды дамытуға және қауіпсіз білім беру ортасын қалыптастыруға да ерекше көңіл бөлінеді. Буллингтің, нашақорлықтың алдын алу, әскери-патриоттық және сыбайлас жемқорлыққа қарсы тәрбиені дамыту бағытында мемлекеттік әлеуметтік тапсырыстар іске асырылуда. Бұл мақсаттарға 11 миллион теңге бөлінген.
Маңызды қадамдардың бірі ретінде 2026–2030 жылдарға арналған «Қазақстан балалары» тұжырымдамасын іске асыру жөніндегі өңірлік жоспар бекітілді. Құжат 96 іс-шараны қамтиды, оның ішінде 29-ы Солтүстік Қазақстан облысының ерекшеліктерін ескере отырып әзірленген. Жоспарды іске асыруға шамамен 13 миллиард теңге қарастырылған.
Әрбір баланың жан-жақты дамуына қолайлы жағдай жасау, отбасы институтын нығайту, кәмелетке толмағандардың құқықтарын қорғау және балаларға уақытылы көмек көрсету өңірдегі мемлекеттік органдар жұмысының басты бағыттарының бірі болып қала береді. Бұл бағыттағы жұмыстар алдағы уақытта да жалғасатын болады.