Солтүстік Қазақстан облысы әкімінің 2023 жылғы 22 желтоқсандағы №188-ө өкімімен бекітілген 2024 жылға арналған Мемлекеттік аудит объектілерінің тізбесіне сәйкес Солтүстік Қазақстан облысы әкімі аппаратының ішкі аудит қызметі «Солтүстік Қазақстан облысы әкімдігінің мәдениет, тілдерді дамыту және архив ісі басқармасының тарихи-мәдени мұраны қорғау және пайдалану жөніндегі орталығы» коммуналдық мемлекеттік мекемесінде (бұдан әрі – Мекеме) 2021 жылғы 1 қаңтардан 2024 жылғы 1 сәуірге дейінгі кезеңге сәйкестік аудитін жүргізді.
Аудиторлық іс-шара барысында бұзушылықтар анықталды: Мекеме бюджет қаражатын игеру мақсатында ағымдағы айдан алдағы айларға және керісінше специфика сомаларын ауыстыруды жүргізген; іссапар шығынын асырып төлеген; азаматтық қызметшілердің еңбегіне ақы төлеу тәртібін айқындайтын Қазақстан Республикасы заңнамасының нормалары бойынша бұзушылыққа жол берген; бензинді нормадан асырып есептен шығарған; негізгі құралдарды сақтауға жауапты лауазымды адамдарды тағайындамаған; тұрақсыздық айыбын өндіріп алу жөнінде шара қабылдамаған; мемлекеттік сатып алуды жүзеге асыру бойынша бұзушылыққа, сондай-ақ бухгалтерлік есепті жүргізу қағидасын бұзуға жол берген.
«Әкімшілік құқық бұзушылық туралы» Қазақстан Республикасының 2014 жылғы 05 шілдедегі № 235-V кодексінің 207, 238-баптарында көзделген мемлекеттік аудит объектісі лауазымды адамдарының іс-әрекеттерінде әкімшілік құқық бұзушылықтардың анықталған белгілері фактісі бойынша тиісті аудиторлық дәлелдемесі бар материалдар әкімшілік құқық бұзушылық туралы істерді қарау үшін уәкілетті орган – Солтүстік Қазақстан облысы бойынша Ішкі мемлекеттік аудит департаментіне жіберілді.
Анықталған бұзушылықтардың себептері – қолданыстағы бюджет және өзге де заңнаманы жеткілікті білмеу, аудит объектісінің лауазымды адамдарының қолданыстағы заңнамаға сәйкес бюджет қаражатының жұмсалуын жеткілікті түрде бақыламауы, сондай-ақ уәкілетті орган – «Солтүстік Қазақстан облысы әкімдігінің мәдениет, тілдерді дамыту және архив ісі басқармасы» КММ тарапынан тиісті бақылаудың болмауы.