Эхинококкоз – гельминттердің бір түрі эхинококктан туындайтын, эхинококк кисталары пайда болып, ішкі органдардың қызметін бұзатын, әсіресе бауыр мен өкпені зақымдайтын жануарлар мен адамдарға жұғатын созылмалы паразиттік ауру.
Бұл инвазия ірі қара мал мен ұсақ малда және жануарлардың басқа да түрінде белгілерсіз өтеді.
Эхинококкоздың бастапқы иесі – иттер, қасқырлар, қорқау қасқырлар, гиеналар, түлкілер, кейбір басқа да жануарлар. Аралық иелері – қойлар, ешкілер, ірі қара мал, түйелер, шошқалар, жылқылар. Адам ауруды жүнінде гельминт жұмыртқалары көп ауру жануарлармен жанасқан кезде, сондай-ақ жидек пен шөп жинау кезінде жұқтырады.
Эхинококкоздың алдын алу үшін жеке гигиена ережелерін сақтау қажет: жануарлармен байланыста болғаннан кейін қолды сабынмен жуу, қайнамаған су ішпеу, көкөністерді, шөптерді, жидектерді ағынды сумен мұқият жуу, балалардың жануарлармен тығыз байланысын шектеу, иттерді (асыранды, қызметтік, мал бағатын, жегетін, күзет, аңшы және т.б. иттер) үнемі құрттардан тазарту, иттерді арнайы бөлінген жерлерде серуендету қажет.
Иттердің эхинококкоз жұқтыруының алдын алу үшін оларды ауыл шаруашылығы жануарлары сойылған орындарға, қалдықтар төгетін шұңқырларға, мал қорымдарына жібермеу, жануарларды арнайы орындарда ғана сою қажет.