Қазақстан Республикасының Үкіметі Қазақстан Республикасының Ауылдық аумақтарын дамытудың 2023-2027 жылдарға арналған тұжырымдамасын бекітті

Халықтың табысының өсуін және ауылдық инфрақұрылымды дамытуды қамтамасыз ету жолымен ауылдық жерлерде өмір сүру сапасын жақсарту және жайлы өмір сүру ортасын құру мақсатында ҚР Үкіметінің 2023 жылғы 28 наурыздағы №270 қаулысымен ҚР ауылдық аумақтарын дамытудың 2023-2027 жылдарға арналған тұжырымдамасы (бұдан әрі – тұжырымдама) қабылданды.

Даму әлеуеті бар ауылдық елді мекендердің (бұдан әрі – АЕМ) тіршілігін қамтамасыз етуді жақсартудың негізгі құралдарының бірі «Ауыл – Ел бесігі» инфрақұрылымдық жобасын іске асыру болып табылатынын атап өту қажет.

Тұжырымдаманы іске асыру шеңберінде даму әлеуеті бар АЕМ-дегі объектілерді салу және реконструкциялау жөніндегі жобаларды «Ауыл – Ел бесігі» жобасы бойынша республикалық бюджеттен қаржыландыру жалғастырылатын болады:

білім беру (мектептердің жапсаржайлары, мектептер мен балабақшаларды реконструкциялау),

денсаулық сақтау (алғашқы медициналық-санитариялық көмек объектілері),

мәдениет (клубтар, мәдениет үйлері, мұражайлар (музейлер), кітапханалар),

спорт (дене шынықтыру-сауықтыру кешендері, спорт кешендері және спорт нысандары),

әлеуметтік қамсыздандыру,

инженерлік инфрақұрылым (су, жылу, газ, электр желілері мен жылу, электр нысандары және жабдықтар),

көлік инфрақұрылымы (кентішілік жолдар, көшелерді жарықтандыру).