Жыл басынан бері Петропавл қалалық мамандандырылған халыққа қызмет көрсету орталығында жоғары сұранысқа ие 312 мемлекеттік тіркеу нөмірлік белгілері (МТНБ) берілді. Оның 257 нөмірін ер адамдар, ал 55 нөмірін әйелдер сатып алды.
VIP желісі аясында сұранысқа ие нөмірлік комбинациялар 010, 020, 030, 040, 050, 060, 070, 077, 080, 090 және 707 болды. Олардың әрқайсысының бағасы 57 АЕК (210 444 теңге) құрады. Ең аз сұранысқа ие 001, 002, 003, 004, 005, 006, 007, 008, 009 және 777 болды. Олардың құны - 285 АЕК (1 052 220 теңге).
Естеріңізге сала кетейік, Қазақстанда «әдемі» нөмірлерді сату тәжірибесі 2014 жылы енгізілген және оларды сатудан түскен табыс ел бюджетіне түседі.
VIP нөмірлерді Мамандырылған ХҚКО-да немесе электрондық үкімет порталы арқылы сатып алуға болады. Бұл ретте бос болса, кез-келген нөмірді таңдауға болады. Петропавл қаласында қызмет көрсету мерзімі 15 күнтізбелік күнді құрайды, жеделдету рәсімі де бар.
Ағымдағы жылы Солтүстік Қазақстан облысының Мамандандырылған халыққа қызмет көрсету орталықтарында 70 мыңнан астам көлік құралы тіркеліп, 15 мың жүргізуші куәлігі берілді.