"Қазақстан Республикасының кейбір заңнамалық актілеріне Еңбек мәселелері бойынша өзгерістер мен толықтырулар енгізу туралы" 2020 жылғы 4 мамырдағы № 321/VI ҚР Заңымен ҚР Еңбек кодексіне жұмыс берушіні электрондық түрде еңбек шарттарын жасасуға не қағаз жеткізгіште жасалған еңбек шарттарын ЕСБТҚ-ға тіркеуге міндеттейтін түзетулер енгізілді. Өзгеріс 2020 жылдың 16 мамырынан бастап заңды күшіне енді, осы кезеңнен бастап жұмыс берушілерде электрондық еңбек шарттарымен жұмыс істеу немесе қағаз еңбек шарттарын ЕСБТҚ-да тіркеу міндеті туындады.
ҚР Еңбек кодексіне енгізілген нормаларға сәйкес 33-бапта еңбек шарты қызметкер мен жұмыс беруші арасында ЭЦҚ-мен куәландырылған электрондық құжат нысанында не жазбаша нысанда жасалуы мүмкін екендігі айқындалған. Бұл ретте 23-бапта жұмыс берушінің қызметкермен еңбек шартын (оған енгізілетін өзгерістер мен толықтыруларды) жасасу және тоқтату туралы ақпаратты еңбек шарттарын есепке алудың бірыңғай жүйесіне енгізу міндеті белгіленген.