Маңызды мәселелер қарастырылды
Аудан әкімі Н. М. Кеңесовтың, аудандық мәслихаттың хатшысы А. С. Асанованың, ауылдық округ әкімдерінің, бірқатар ұйымдардың басшыларының қатысуымен, Н. З. Алиевтің төрағалығымен аудандық мәслихаттың тұрақты комиссияларының кезекті бірлескен отырысы өтті.
Қазақстан Республикасы Жер кодексінің талаптарына сәйкес ауданның жер қорының жай-күйі мен пайдаланылуы туралы айта отырып, жер қатынастары бөлімінің басшысы А. Қ. Қасенов аса маңызды проблемаларға егжей-тегжейлі тоқталды.
Біріншісі — пайдаланылмаған жерлер.
Мәселен, 2018-2019 жылдары ауыл шаруашылығы мақсатындағы 13 мың га жерді пайдаланбау фактілері бойынша 17 жосықсыз жер пайдаланушыға 800 мың теңге сомасына әкімшілік жазалар салынды, жер заңнамасын бұзушылықтарды жою туралы нұсқамалар берілді.
Ағымдағы жылы 833 га алқаптағы ауыл шаруашылығы мақсатындағы 7 учаскеде олардың нысаналы мақсатына сәйкес жердің пайдаланылмағаны анықталды. Барлық фактілер бойынша тексеру іс-шараларын жүргізу үшін жер инспекторына өтініш жіберілді, олардың нәтижелері бойынша сот арқылы жерді қайтаруға дейін бұзушылықтарды жою үшін одан әрі шаралар қабылданатын болады.
Тағы бір маңызды мәселе — жайылым тапшылығы.
Бөлім басшысы қалыптасқан жағдайдың негізгі себебін атады: соңғы он жыл ішінде ауданда жайылымнан егістікке 15 мың га ауыстырылды, сонымен қатар 2010-2018 жылдары жайылымнан егістікке ауыл шаруашылығы алқаптарының 89% немесе 13282 га өзгертілді. Бұл шара ауыл шаруашылығы тауарын өндірушілердің субсидия алуы үшін қажет болды, сонымен қатар жер қатынастары басқармасында жыл сайын егіс алқаптарын ұлғайту жөніндегі жоспарлар бекітілді.
Бүгінгі таңда мал жаю үшін жайылымдық жерлерді ұлғайту мақсатында жалпы ауданы 1765,5 га Тимирязев, Докучаев, Интернационал ауылдық округтеріндегі босалқы жерлерден ауыл шаруашылығы мақсатындағы жер учаскелерін ұлғайту (кесу) жүргізілуде, бұл жұмыс Москворецк (463,9 га), Белоградов (1714 га) ауылдық округтерінде жобалауда.
2022 жылғы 1 қаңтардан бастап Қазақстан Республикасының кейбір заңнамалық актілеріне жер қатынастарын дамыту мәселелері бойынша өзгерістер мен толықтырулар заңды күшіне енеді, — деп атап өтті А. Қ. Қасенов.
Күн тәртібіндегі келесі үш мәселені шешу аудандық мәслихаттың сәулет, құрылыс, тұрғын үй-коммуналдық шаруашылық, жолаушылар көлігі және автомобиль жолдары бөлімінің және оның басшысы М. М. Байғожиннің құзыретіне кіреді. Олар аудандық мәслихаттың бақылау функциялары аясында қаралды.
Тимирязев ауданының елді мекендерін таза ауыз сумен қамтамасыз ету туралы мәселе ғана ескертпелермен бақылаудан алынды. Осы тақырыпта толғандыратын мәселелер аз болмауына қарамастан, депутаттар аудан тұрғындарын сумен қамтамасыз етудегі елеулі серпілісті атап өтті, осы жұмысты жалғастырудың оптимистік жоспарларының болуын ескерді.
Тимирязев ауданының жолдарын жөндеу сапасы, коммуналдық тұрғын үй қорын басқару, оның сақталуын және тиісінше пайдаланылуын қамтамасыз ету, оның ішінде «Жұмыспен қамту жол картасы» бағдарламасы шеңберінде салынған және сатып алынған тұрғын үй мәселелері ауданның депутаттық корпусының назарында қалуда.
Отырысқа қатысушылар аталған мәселелер бойынша бірқатар проблемаларды атап өтті: жолдарды жөндеуге арналған жобалау-сметалық құжаттаманы әзірлеу сапасы, жүргізілетін жұмыстардың оған сәйкестігі, бұзушылықтарға ден қоюдың жеделдігін арттыру, процеске ауылдық округ әкімдері, жұртшылық тарапынан бақылауды күшейту; коммуналдық тұрғын үйді жалға алуға шарт жасасқан адамдардың онда нақты тұратындармен сәйкестігі тұрғысынан сәйкестендіру жүргізу, борышкерлермен жұмысты қатаңдату, жалға алынатын тұрғын үйді сатып алу мүмкіндіктерін қарау және т. б.
Мәселелерді талқылаудың мазмұны тұрақты комиссиялардың қаулыларын іске асыру деңгейі кездесулер барысында аудан тұрғындарынан депутаттар үнемі тыңдайтын талаптарға, мүдделерге, үміттерге, өтініштерге жауап бермейтіндігін көрсетеді.