Электрондық үкімет негіздері мектепте үйретіледі

«Азаматтарға арналған үкiмет» мемлекеттiк корпорациясының бастамасымен информатика пәнi бағдарламасына «электрондық үкiмет порталы» бөлiмдерi енгiзiледi. Мемлекеттiк корпорацияның бұл ұсынысын ҚР Бiлiм және ғылым министрлiгi қолдап, тиiстi бұйрыққа Ерлан Сағадиев қол қойды. Осылайша, 11-сынып оқушыларының оқу бағдарламасына қажеттi өзгерiстер ендiрiледi.

«Цифрлық Қазақстан» бағдарламасына сәйкес, орта, техникалық және жоғары кәсiби бiлiм беру ұйымдарында цифрлық сауаттылықты арттыру қажет. Балалар мектеп жасынан-ақ цифрлық технологиялардың тiлiн түсiнiп, түрлi электрондық жүйенi қолдануды үйренуi тиiс. Осы орайда, 11-сынып оқушылары ақпараттық технологиялар мен ондағы қауiпсiздiк сабақтары аясында электронды үкiмет порталының жұмыс iстеу алгоритiмiн бiлiп, электрондық құжаттар, цифрлық қолтаңба сияқты терминдермен танысып, мемлекеттiк қызметтердi электрондық форматта алу үрдiсiн үйрене алады.

«Орта есеппен жыл сайын мектептi 140 мың оқушы тәмамдайды десек, мемлекеттiк қызметтердi ХҚО-ға бармай-ақ алуды бiлетiн «цифрлық» ұрпақ саны жыл өте көбейiп отырады. Оның үстiне, ол балалар ата-аналарына, ата-әжелерiне электронды үкiмет порталын қолдануға көмектесе алады. Бұл халық арасында цифрлық сауаттылық көрсеткiшiнiң артуына, сөзсiз, әсер етедi», — дейдi «Азаматтарға арналған үкiмет» мемлекеттiк корпорациясының басқарма төрағасы Аблайхан Оспанов.

Айта кетейiк, бүгiнде елiмiздiң 16 өңiрiнде ашылған Цифрлық ХҚО арқылы тегiн «Цифрлық сауат ашу» курстарына қатысып, электрондық үкiмет порталымен жұмыс iстеу дағдыларын үйренуге болады. Осы күнге дейiн 5 мыңнан астам адам аталмыш курстардан өтiп, тиiстi сертификаттар алған. Оған қоса, 2018 жылы мемлекеттiк корпорацияның ұйымдастыруымен «Электрондық үкiмет және электрондық мемлекеттiк қызметтер» курсынан жергiлiктi атқарушы органдардың 3500 өкiлi өттi. Олар, өз кезегiнде, жаттықтырушы мәртебесiн алып, алған бiлiмдерiн 686 мың азаматқа үйреттi.