АҚШ профессоры Қазақстанның электронды үкiметiнiң цифрлық шешiмдерiне таңқалысын бiлдiрдi

Оңтүстiк Калифорния университетiнiң Интерактивтi медиа кафедрасының профессоры Майк Фишер EXPO аумағында орналасқан ХҚО-да болды. Қонаққа электрондық үкiметтiң, egov mobile мобильдiк қосымшасы және телеграм мэссенджерiндегi бот арқылы мемлекеттiк қызметтердi алу мүмкiндiктерi таныстырылды. Шетелдiк сарапшыны бәрiнен бұрын азаматтардың мемлекеттiк органдардың бiрiншi басшыларына онлайн тәртiпте бейнеөтiнiш жолдап, биометрия әдiсiмен мемлекеттiк қызметтердi алу мүмкiндiгi қызықтырды.

«Мемлекеттiк органның бiрiншi басшысына өтiнiштi тiкелей жiберу мүмкiндiгi маған өте ұнады. Мәселен, қала тұрғындарына мэрияға барудың қажетi жоқ, уақытыңызды жұмсамайсыз, оны ХҚО-дағы камерасы бар жабдық арқылы онлайн жолдауға болады. Бұл өте ыңғайлы», — дедi Фишер. Оның пiкiрiнше, бұл азаматтарға елдiң қоғамдық, әлеуметтiк, саяси өмiрiне араласуына жол ашып, сол арқылы мемлекеттiк органдарға қазақстандықтардың қажеттiлiктерiн түсiнуге мүмкiндiк бередi.

Сондай-ақ америкалық профессор мемлекеттiк қызметтердi алудың биометриялық тәсiлiне таңғалысын бiлдiрдi.

«Мен үшiн бұл жүйе өте қызық. Яғни, егер сiз өзiңiздiң сәйкестендiру картаңызды (жеке куәлiк) жоғалтсаңыз, қажеттi мемлекеттiк қызметтi осы тәсiлмен еш құжатсыз ала аласыз», — дейдi ол.

Цифрлық ХҚО-да гейммейкер, сондай-ақ автосимуляторды сынақтан өткiзiп, оны бейне ойынмен салыстырды. Ол автосимулятор ойынға қарағанда дiттеген жерге жылдам жетiп қана қоймай, жолда жүру машығын да шыңдайды деп атап өттi.

Естерiңiзге сала кетейiк, Нұр-Сұлтанда IT-шешiмдер, цифрлық технологиялар және т.б. сала сарапшыларының қатысуымен «Digital Bridge» халықаралық технологиялық форумы өтiп жатыр.