ҚР Еңбек кодексі жұмыскерлер үшін айлық жалақының ең төменгі мөлшері (2024 жылға 85 000 теңге), күнделікті жұмыстың (жұмыс ауысымының) ұзақтығы, жыл сайынғы негізгі ақылы еңбек демалысы (24 күнтізбелік күн), орташа жалақы мөлшерінде жұмысынан айырылуына байланысты бір айдан екі айға дейінгі өтемақы төлемдері түріндегі еңбек және өтемақы саласындағы ең төмен әлеуметтік кепілдіктерді белгілейді.
Алайда, жұмыс беруші ұжымдық шарт пен өңірлік келісімдер жасай отырып, еңбек кодексінде көзделген еңбек жағдайларын жақсартуға бағытталған қосымша кепілдіктер мен жеңілдіктерді көздеуге, яғни жұмысынан, жалақысынан, демалысынан және өзге де төлемдерден айырылуына байланысты өтемақы төлемінің неғұрлым жоғары мөлшерін көздеуге құқылы.
Сондай-ақ, ұжымдық шарт пен өңірлік келісім экономикалық саясатты нығайту, еңбек қатынастарын, дауларды реттеу, тиімді жұмыспен қамтуды қамтамасыз ету, лайықты еңбекақы төлеу жағдайларын жасау жөніндегі құрал болып табылады және тиісті әкімшілік-аумақтық бірліктің жергілікті атқарушы органдарына, жұмыс берушілеріне, қызметкерлеріне және олардың өкілдеріне қолданылады.
Осыған байланысты, ҚР ЕХӘҚМ мемлекеттік еңбек инспекциясы комитетінің СҚО бойынша департаменті жұмыс берушілер мен қызметкерлерге әлеуметтік әріптестікті және өзара тиімді жағдайларды дамыту мақсатында ұжымдық шарттар жасасуды ұсынады.