ШЫМКЕНТТІҢ ОҚУШЫЛАРЫ РЕСПУБЛИКАЛЫҚ САЙЫСТА КОМАНДАЛЫҚ ЖЕҢІСКЕ ЖЕТТІ

Қызылорда қаласында оқушылар арасында республикалық «Ұлттық мектеп лигасы» жарысы аяқталды. Додаға Қазақстанның 18 өңірінен әр спорт түрі бойынша үздік деп танылған командалар қатысып, өзара мықтыны анықтады.

Шымкент қаласының намысын бірнеше спорт түрінен дарынды оқушылар абыроймен қорғады.

Атап айтқанда, шахматтан – №9 IT мектеп-лицейі, бес асықтан – №90 дарынды балаларға арналған мектеп-гимназиясы, ал үстел теннисінен №119 мектеп командалары бақ сынады.

7-8 сынып оқушылары арасында өткен жарыста шымкенттік шахматшылар ерекше шеберлік пен жоғары дайындық деңгейін көрсетіп, командалық есепте І орынды жеңіп алды. Жерлестеріміз жеті кездесудің жетеуінде де айқын басымдықпен жеңіске жетті.

Сонымен қатар, бес асық спорт түрінен №90 мектеп-гимназиясының командасы ІІІ орынды иеленсе, үстел теннисінен №119 мектеп командасы да үздік үштіктен көрініп, қола жүлдеге қол жеткізді.

Бұл – шымкенттік оқушылардың табандылығы мен ұстаздардың жүйелі еңбегінің, жас спортшыларға көрсетіліп жатқан қолдаудың айқын нәтижесі.