1-тарау. Жалпы ережелер
1. Шымкент қаласының Қоғамдық кеңесі туралы ереже (бұдан әрі – Ереже) Қазақстан Республикасының 2015 жылғы 2 қарашадағы «Қоғамдық кеңестер туралы» (бұдан әрі – Заң) Заңының 2-1-бабы 2-тармағының
4) тармақшасына сәйкес әзірленді.
2. Шымкент қаласының Қоғамдық кеңесi коммерциялық емес ұйымдармен және азаматтармен бiрлесiп өз құзыретiнiң мәселелерi бойынша Шымкент қаласының мәслихаты құратын консультациялық-кеңесшi, бақылаушы орган болып табылады.
3. Қоғамдық кеңес өз қызметінде Қазақстан Республикасының Конституциясын, заңдарын, Қазақстан Республикасының Президенті мен Үкіметінің актілерін, «Қоғамдық кеңестер туралы» Заңды (бұдан әрі – Заң) және өзге де нормативтік құқықтық актілер мен осы ережені басшылыққа алады.
1-параграф. Қоғамдық кеңестің мақсаты мен міндеттері
4. Қоғамдық кеңес қызметінің мақсаты әлеуметтік маңызы бар мәселелер бойынша азаматтық қоғамның пікірін білдіру болып табылады.
5. Қоғамдық кеңестің міндеттері:
5.1. азаматтық қоғамның мүдделерін білдіру және республикалық, әрі жергілікті деңгейде талқылаулар мен шешімдер қабылдау кезінде қоғамдық пікірді ескеру;
5.2. орталық атқарушы органдар мен Шымкент қаласының жергілікті мемлекеттік және өзін-өзі басқару органдарының, сондай-ақ квазимемлекеттік сектор субъектілерінің азаматтық қоғаммен өзара іс-қимылын дамыту;
5.3. қоғамдық бақылауды ұйымдастыру және орталық атқарушы органдар мен жергілікті мемлекеттік органдардың және Шымкент қаласының өзін-өзі басқару органдарының, сондай-ақ квазимемлекеттік сектор субъектілері қызметінің ашықтығын қамтамасыз ету.
2-параграф. Қоғамдық кеңес қызметінің қағидаттары
6. Қоғамдық кеңес өз қызметін мынадай қағидаттар негізінде жүзеге асырады:
6.1. тәуелсіздік;
6.2. оның мүшелерінің ерікті негіздегі қызметі;
6.3. дербестік;
6.4. тәуелсіздік;
6.5. жариялылық.