Бақытжан Сағынтаев Қазақстанның жас ғалымдарымен отандық ғылымды дамыту мәселелерін талқылады

Қазақстан Премьер-Министрі Бақытжан Сағынтаев еліміздің жас ғалымдарымен кездесіп, ғылыми қауымдастықпен отандық ғылымды дамыту мүмкіндіктерін талқылады.            

Кездесу мақсаты-отандық ғылымның жағдайы мен даму перспективаларын талқылау. Сондай-ақ, талқылауға Қазақстанның Білім және ғылым министрі Ерлан Сағадиев, Алматы әкімі Бауыржан Байбек, сондай-ақ Қазақстанның жоғары оқу орындары мен ғылыми ұйымдарынан 50-ге жуық жас ғалымдар қатысты.

Талқылаудың басты тақырыптарының бірі жас ғалымдар үшін ғылыми гранттарға, сондай-ақ оқу зертханаларының техникалық жабдықталуына қаржы бөлу мәселесі болды. Бұдан басқа, кездесуге қатысушылар ғылыми жобаларға сараптама жүргізу рәсімін жетілдіру тәсілдерін талқылады. Атап айтқанда, тараптар ұлттық ғылыми кеңес мүшелерінің жұмысындағы мүдделер қақтығысын болдырмау, ғылыми жобаларды гранттық және бағдарламалық-нысаналы қаржыландыру бойынша конкурсқа қатысуға өтінімдерді іріктеу сапасын арттыру мүмкіндігін қарастырды. Сонымен қатар, талқылау барысында ғылыми дәрежелер мен атақтар беру кезінде ғылыми журналдардағы жарияланымдарға қойылатын талаптарды күшейту мәселесі қозғалды.

Жас ғалымдарға әлеуметтік қолдау көрсетуді талқылау барысында кездесуге қатысушылар жас мамандарды жатақханамен қамтамасыз ету, ғылыми зерттеулерге халықаралық көзқарасты ынталандыру және қазақстандық ғылымның жаһандық ғылыми кеңістікте интеграциялануын қамтамасыз ету қажеттілігіне назар аударды. Кездесу қатысушылары Қазақстанның жоғары оқу орындарын және ғылыми ұйымдарын Мемлекеттік сатып алу туралы заңнан алып тастауды, сондай-ақ докторанттарға арналған стипендия мөлшерін көбейтуді ұсынды.

Келесі кездесу ұқсас форматта Астана қаласында 2019 жылда өтеді. Талқылаудың басты тақырыбы ел дамуының ғылыми бағыттары және ғылыми қоғамдастық алдында жаңа міндеттер болады.