АБАЙ АТЫНДАҒЫ ҚАЗҰПУ-ДА «ҒЫЛЫМ ДЕКАДАСЫ-2024» САЛТАНАТТЫ ІС-ШАРАСЫ ӨТТІ
2024 жылдың 9 сәуірінде Абай атындағы ҚазҰПУ-да «Ғылым декадасы-2024» аясында Ғылым қызметкерлері күніне арналған салтанатты іс-шара өтті.
Іс-шара әлемдегі ғылымның даму тарихына арналған әсерлі презентациямен, сондай-ақ 96 жылдық тарихы бар тұңғыш университеттің оқытушылары мен ғалымдарының ғылыми жетістіктерін көрсететін фильммен басталды. Университет қауымдастығында ғылыми саланың рухы мен құндылықтарын бейнелейтін Ғылым декадасының әнұраны орындалды.
Болат Тілеп университет пен оның ғалымдарының ғылыми жетістіктерін атап өтіп, зерттеушілердің, оның ішінде жас ғалымдардың жоғары әлеуетін бағалап, ғылыми қызметті дамытудың маңыздылығына тоқталды.
«Біз еліміздегі жетекші педагогикалық зерттеу университеті мәртебесін алуға және Орталық Азия өңіріндегі академиялық басымдықтың орталығына айналуға ұмтыламыз. Ол үшін алдымызға орта және мектепке дейінгі білім беру ұйымдарына басымдық беретін ғылыми жобалардың санын арттыру, университет базасында орындалған ғылыми зерттеулер нәтижелеріне мониторинг жүргізіп, коммерциаландыру көздерін арттыру, «Abai Labs» ғылыми-инновациялық паркінің құрамында озық технологиялық, инновациялық және шығармашылық зертханаларды іске қосу және олардың өзін-өзі қаржыландыру мүмкіндіктерін қарастыру сияқты перспективалық міндеттер қойып отырмыз.», - деді ректор.
Іс-шара барысында ғылымның дамуына қосқан үлесі үшін ғылым ардагерлері: ҚР ҰҒА академигі Салахиден Сабикенов; ғылым докторлары, профессорлар Марат Күлбек, Берікжан Әлмұхамбетов, Нұрлан Ахметов, Құрман Мұратаев, Бақытжан Төлеубекова және Балқия Қасым марапатталды.
Университет пен мектептер арасындағы ынтымақтастық аясында іске асырылып жатқан «Органикалық қалдықтарды өңдеуде оқу-тәжірибелік алаңдар ашудың педагогикалық мүмкіндіктері» пилоттық жоба нәтижелері бойынша мектеп оқушылары жобаның құрылу тарихы, оның мақсаттары мен ағымдағы жай-күйі туралы айтып, өз нәтижелерін көрмеге ұсынды.
Сонымен қатар, салтанатты іс-шарада жас зерттеушілерге арналған «Жас кәсіпкер» Ректор гранты Startup жобаларының конкурсы жарияланды.