ҚазАТЗУ магистранттары ҚХР Солтүстік-Батыс ауыл және орман шаруашылығы университетінде оқиды
ҚазАТЗУ-дың 30-дан астам түлегі Қытай жоғары оқу орнында магистратура, докторантура және постдокторантура бағдарламалары бойынша білім алады. Оларға екі университеттің дипломдары беріледі.
Мемлекет Басшысы Қасым-Жомарт Тоқаевтың ҚХР-ға ресми сапары барысында 2023 жылғы мамырда Қазатиу мен ҚХР солтүстік-батыс ауыл және орман шаруашылығы университеті (Northwest A&F University) арасында қос диплом ала отырып тамақ және қайта өңдеу өндірістерінің технологиялары саласындағы магистрлік бағдарламаны бірлесіп әзірлеу және іске асыру туралы келісімге қол қойылған болатын.
Осыған байланысты ҚазАТЗУ-да қазақстандық магистранттарды солтүстік-батыс ауыл және орман шаруашылығы университетіне оқуға қабылдаудың салтанатты ашылуына арналған іс-шара өтті. "Біздің магистранттар әлемдік деңгейге сәйкес білім алады деп сеніммен айта аламын. Біз бірлескен күш-жігер жұмсай отырып қос дипломды білім алуды іске асырғанымызға шын жүректен қуаныштымыз. Бұл біздің жастарымыздың игілігі үшін жалғасатын және дамитын бірлескен қызметіміздің бастамасы ғана деп сенеміз", - деп атап өтті С.Сейфуллин атындағы Қазақ агротехникалық зерттеу университетінің Басқарма Төрағасы-ректоры, ҚР ҰҒА академигі Қанат Тіреуов.
Сондай-ақ, ҚХР Харбин ғылыми-зерттеу ветеринариялық институтымен бірлесіп ҚазАТЗУ-да Қазақстан-Қытай биологиялық қауіпсіздік зертханасы құрылды. Сонымен қатар, Солтүстік-Батыс, Пекин, Шыңжаң, Хэнань университеттерімен, Қытай ауыл шаруашылығы ғылымдары академиясымен, Huawei компаниясымен және ҚХР-дан басқа серіктестермен Қазақстан-Қытай ғылыми-білім беру және технологиялық консорциумы құрылуда.
Айта кетейік, С.Сейфуллин атындағы Қазақ агротехникалық зерттеу университеті шетелдік әріптестер желісін кеңейту, білім және ғылым саласындағы Халықаралық бағдарламалар мен жобаларға қатысу арқылы халықаралық ынтымақтастықты дамытуда. Жалпы ЖОО әлемнің 40-тан астам елімен жұмыс істейді.
ҚазАТЗУ зерттеу университеті ретінде білім беру бағдарламаларын интернационалдандыру және академиялық ұтқырлықты дамыту мәселесіне көп көңіл бөледі. Басты мақсат – университет түлектерінің отандық және халықаралық еңбек нарығында бәсекеге қабілеттілігі мен сұранысын арттыру.