ҚБТУ жаңа студенттік жатақхана мен спорт кешенін ашты
Қазақстан-Британ техникалық университеті студенттерге арналған жаңа жатақхана және спорт кешенін ашты.
Ашылу салтанатында Қазақстан-Британ техникалық университетінің ректоры Маратбек Ғабдуллин атқарған жұмыстары үшін баршаға өз алғысын білдірді:
«Өткен жылы біз студенттерімізге барлық жағдайы жасалған жатақхана ашамыз деп шешім қабылдадық. 10 айдың ішінде біз үлкен жұмыс жасадық. Көріп отырғандарыңыздай, жалпы ауданы 14.000 шаршы метрден астам екі жаңа ғимаратта сыйымдылығы 980 төсек-орындық жатақхана мен спорт кешенінің құрылысын аяқтадық», - деді ҚБТУ ректоры.
2023 жылы ҚБТУ екі жаңа тоғыз қабатты жатақхана ғимаратын және сыйымдылығы 198 орындық трибуналары бар ойын залынан тұратын үш қабатты спорт кешенін салды. Спорт кешенінде студенттер үстел теннисі, бокс, күрес, футзал, волейбол, баскетбол, гандбол және басқа да спорт түрлерімен айналыса алады, одан бөлек хореография сабақтарын өткізуге және жаттығуға арналған зал жұмыс істейтін болады.
ҚБТУ студенттік басқармасының президенті Диана Серікбаева құттықтау сөзінде басшылыққа жақсы оқу мен даму жағдайына жұмсалған күш-жігері үшін алғысын білдірді.
«Студенттердің жақсы білім алып, жан-жақты дамуына қолайлы жағдай жасап отырғандарыңызға алғысымызды жеткізгім келеді. Университеттің бізге көрсеткен қолдауын бағалаймыз. Жаңа жатақхана академиялық отбасымыз үшін прогресстің символына айналып, студенттердің құтты үйі атансын»,- деді Диана.
Жастарға қолжетімді әрі сапалы білім берумен қатар, студенттерге жаңа жатақханалар салу – еліміздегі маңызды бағыттардың бірі.
Студенттерді заманауи үлгіде салынған, жайлы әрі қауіпсіздік жағы қарастырылған жатақханалармен қамтамасыз етуге басымдық берілген. Айта кетейік, елде, студенттер тұратын жатақхана тапшы, әсіресе бұл мәселе Алматыда қатты сезілуде. Мәселенің оң шешімін табу үшін қазіргі уақытта мегаполисте жатақхана құрылысын тиімді үйлестіру мақсатында Жобалық кеңсе де іске қосылған. Жобаны қолдауға 114 әлеуетті инвестор өтініш білдіргені айтылуда. Алматы әкімі Ерболат Досаев қалада 2025 жылдың соңына дейін 12 мың, 2030 жылдың соңына дейін тағы 20 мың жатақханалық орын ашылатынын, бұл жатақхана тапшылығы мәселесін толығымен шешетінін айтып отыр.
Қазақстан-Британ техникалық университеті осы бағытта Алматы қаласы әкімдігімен, Қазақстан Республикасының Ғылым және жоғары білім министрлігімен етене жұмыс істеуде.
Жатақханаға қатысты мәселенің өзектілігін ескере отырып, ҚБТУ-да басқа қаладан келіп оқитын барлық студенттерді жатақханамен қамтамасыз ету және тұрғын үй қорын кеңейту мақсатында университет басшылығы заманауи талаптарға сай жаңа ғимараттар салу туралы шешім қабылдаған.
Жатақхана ескі ғимараттың орнына салынған. Құрылыс 2023 жылдың ақпанында басталып, сол жылдың желтоқсанында аяқталды. Жатақхана корпустарында демалатын бөлмелер, асбөлмелер, оқу бөлмелері, 120 орындық акт залы, 70 орындық асхана, кір жуатын орындар, төсек-орындарды қабылдайтын және тапсыратын бөлмелері қарастырылған. Әр жатақхана корпусында екі лифт, бейнебақылау камералары мен Wi-Fi орнатылған, әр бөлменің жуынатын бөлмесі мен дәретханасы жеке. Айта кетейік, жатақханада мүмкіндігі шектеулі студенттерге арнайы жабдықталған бөлмелер де бар.
Ғимараттар заманауи талаптарға сай салынған. Жоспарланғандай, жатақхана мерзімінде тапсырылды.
Аталмыш ғимараттардың құрылысы ҚБТУ-дың жеке қаражаты есебінен жүргізілген. Ал мердігер болып ашық тендер арқылы BI-Group құрылыс компаниясы таңдалған. Ғимараттардың құрылысы барысында барлық құрылыс нормалары қатаң сақталған.