Саясат Нұрбек Жетісу облысындағы «Студенттер үйінің» жағдайын тексерді

🇰🇿

⚜️ Жетісу облысына жұмыс сапары аясында ҚР Ғылым және жоғары білім министрі Саясат Нұрбек «Студенттер Үйіне» барды.

Бұл жатақхана 2021 жылы салынған. 13 қабатты ғимараттың 300 орынға арналған 96 қонақ бөлмесі бар. Мұнда жайлы тұруға, оқуға және демалуға барлық жағдай жасалған. Кітапхана, тұрмыстық және душ бөлмелерімен жабдықталған, кофехана, тренажер залы, компьютерлік сыныптар, шағын кинотеатр және бірнеше көру алаңдары бар. Өте күрделі және әдемі архитектуралық нысанның терезелерінен жазда жарықтандырылған субұрқақ жұмыс істейтін қалалық бассейн жағалауының көркем көрінісін көруге болады.

Жалпы, Жетісу университетінде 1000-ға жуық адамға арналған 3 жатақхана жұмыс істейді. ЖОО өкілдерінің айтуынша, жарты ғасырлық тарихы бар білім беру мекемесінде жатақханаларда орын тапшылығы жоқ.

Университетке бару аясында министр студенттермен кездесу өткізді, онда ашық диалогта жастар өздерін қызықтырған барлық сұрақтарын қоя алды. Мысалы, "Құқық және экономика жоғары мектебінің" 4 курс студенті Айбек Қанатбекұлы заңгерлер үшін стипендияны арттыру мүмкіндігі туралы сұрады. Министр Саясат Нұрбектің айтуынша, бұл белгілі бір мамандыққа деген сұранысқа байланысты.

Мысалы, болашақ оқытушылардың стипендиясы жоғары болу себебі - елде мұғалімдер кадрларының жетіспеушілігі байқалады. Жалпы, әңгіме өзара түсіністік пен достық атмосферасында өтті. Ведомство басшысы барлық сұрақтарға жауап беріп, студенттердің өңірдегі жоғары білім беруді дамыту жөніндегі ұсыныстарын назарға алатынын атап өтті.

Сондай-ақ, ведомство басшысы І.Жансүгіров атындағы Жетісу университетінің базасында салынып жатқан жаңа оқу-зертханалық кешен құрылысының барысымен танысты. Құрылысты 2024 жылдың басында аяқтау жоспарлануда. Бұл кешенге оқу және ғылыми зертханалар мен технопарк, дәріс аудиториялары, "STEM LAB: жаратылыстану ғылымдарының ғылыми-оқу зертханасы", сондай-ақ эксперименттік алаңды, Биотехнология және экология ҒЗИ ғылыми зертханаларын қамтитын бесінші буын жылыжайы кіреді, онда агробиотехнология саласында кадрлар даярлауды жүргізеді.

Ведомство басшысының жұмыс сапарының соңғы нүктесі Жетісу университетінің жабық бассейнін тексеру болды, оған университет студенттері мен оқытушылары тегін бара алады.

Бұл университетте сапалы білім алу үшін ғана емес, денсаулықты нығайту мен әр түрлі және пайдалы демалыс үшін барлық жағдай жасалғанын көрсетеді.