МИНИСТР САЯСАТ НҰРБЕК ТӘЖІКСТАН ПРЕЗИДЕНТІ ЖАНЫНДАҒЫ МЕМЛЕКЕТТІК БАСҚАРУ АКАДЕМИЯСЫНДА БОЛДЫ
Бүгін ҚР Ғылым және жоғары білім министрі Саясат Нұрбек Тәжікстан Президенті жанындағы Мемлекеттік басқару академиясына барды.
Университетте министр оқушылар мен профессор-оқытушылар құрамы алдында дәріс оқыды. Саясат Нұрбек өз дәрісінде білім және ғылым саласындағы бірлескен жұмыстың рөлін атап өтті, цифрландырудың, атап айтқанда жасанды интеллекттің ағымдағы трендтері мен оның өміріміздің барлық салаларына әсері туралы айтты. Сондай-ақ, білім алушылар мен оқытушылардың ІТ-дағдыларын дамыту үшін ҚР Ғылым және жоғары білім министрлігі қабылдайтын шаралармен бөлісті.
«IТ, блокчейн технологиялары, АКТ индустриясы мен қоғамдастық үшін жасанды интеллект бойынша студенттер мен оқытушылардың практикалық дағдыларын дамыту мақсатында бүгінгі таңда Министрлік Coursera, Google, Microsoft, Huawei, НР, Amazon, Дүниежүзілік банк, Times Higher Education сияқты компаниялармен серіктестік орнатуда», - деп атап өтті Саясат Нұрбек.
Іс-шара соңында министр АМУ ректоры Ғафурзода Абдухалил Давлати және ЕҰУ ректоры Ерлан Садықовпен бірге Тәжікстан Республикасы Президенті жанындағы Мемлекеттік басқару академиясының және Л. Н. Гумилев атындағы Еуразия ұлттық университетінің бірлескен магистрлік бағдарламасының дипломдарын табыс етті.
Сонымен қатар, Саясат Нұрбек Душанбе қаласындағы жасанды интеллект академиясында болып, Тәжікстан Республикасы Өнеркәсіп және жаңа технологиялар министрлігі жанындағы Жасанды интеллект кеңесінің қызметімен танысты. Кездесу барысында академия өкілдері жасанды интеллект технологияларын қолдана отырып, білім беру және кәсіптік бағдарлау саласындағы IT-жобаларды ұсынды.