ОТАНДЫҚ ЖОҒАРЫ ОҚУ ОРЫНДАРЫНА ТҮСУГЕ ҚҰЖАТ ҚАБЫЛДАУ ЖАЛҒАСУДА

Қазақстанда жоғары оқу орындарына түсуге ниетті талапкерлерден құжат қабылдау жалғасуда. Құжаттарды 25 тамызға дейін (қоса алғанда) тапсыруға болады.

Қабылдау жоғары оқу орындарының қабылдау комиссиялары арқылы офлайн форматта, сондай-ақ «Egov электрондық үкімет» порталы арқылы онлайн форматта жүзеге асырылады. Қызметті білім беру гранттарының иегерлері де, ақылы оқуға түсетіндер де электронды түрде қолдана алады.

Естеріңізге сала кетсек, отандық жоо-ларға оқуға түсу үшін талапкерлер жеке куәлік, 3х4 көлеміндегі фото, орта білім туралы аттестат немесе техникалық және кәсіптік білім беру (ТжКБ) ұйымдарының түлектері үшін диплом, № 075/у нысанындағы медициналық анықтама, ер жігіттер үшін әскери тіркелу куәлігін, білім грантын тағайындау туралы электронды куәлігін тапсыру керек. Сондай-ақ, жеңілдетілген санат бойынша растайтын құжаттар ұсынылады.