Esil University-де MEDIA HUB ашылды

Esil University-де жасанды интеллект саласында заманауи технологияларды енгізу мәселелеріне бағытталған конференция өтті. Іс-шараның басты оқиғасы – медиа технологиялар, цифрлық коммуникациялар және студенттік жобаларды дамытуға арналған заманауи кеңістік ESIL MEDIA HUB-тың ресми ашылуы болды.

ESIL MEDIA HUB – журналистика, PR, дизайн және IT салаларындағы студенттерді, оқытушыларды және салалық мамандарды біріктіретін инновациялық орталық ретінде құрылды. Жаңа кеңістік оқу және шығармашылық жобаларды жүзеге асыруға қажетті инфрақұрылыммен толық жабдықталған.

Ашылу рәсімінен кейін Esil University мен ҚР Спорт министрлігіне қарасты «Қазспортинвест» АҚ арасында өзара ынтымақтастық туралы Меморандумға қол қойылды. Құжатқа университет ректоры мен компания президенті Алибек Хасенов қол қойып, студенттік бастамаларды дамыту мен бірлескен жобаларды жүзеге асырудағы серіктестіктің маңызын атап өтті.

Конференция бағдарламасы аясында бірқатар мазмұнды баяндамалар ұсынылды. ҚР Ұлттық Банкі Орталық филиалы директорының орынбасары Руслана Ищанова ұлттық валютаның банкноттарының эволюциясы туралы баяндама жасап, қорғаныс жүйелерінің даму кезеңдеріне және заманауи дизайн тәсілдеріне назар аударды.

Esil University ректоры, э.ғ.д., профессор Аяпберген Таубаев медиахабтың ашылуы университет үшін жаңа мүмкіндіктерге жол ашатынын атап өтті:

«Біз студенттердің тек білім алып қана қоймай, оны тәжірибеде қолдануына жағдай жасайтын инфрақұрылым қалыптастырып жатырмыз. ESIL MEDIA HUB – жаңашыл идеялар, тың жобалар мен жаңа деңгейдегі кәсіби қабілеттер қалыптасатын кеңістік. Бұл университеттің модернизацияланып келе жатқан білім беру орталығы ретіндегі позициясын нығайтудың маңызды қадамы», – деді ректор.

Іс-шара аясында академиялық сұрақтар бойынша проректор, э.ғ.д., профессор Серік Мақыштың жетекшілігімен дайындалған «Халықтың қаржылық сауаттылығын арттыру негіздері» атты кітаптың тұсаукесері өтті.

MEDIA HUB-тың ашылуы Esil University-дің цифрлық инфрақұрылымын дамытудағы маңызды кезең болып, университеттің инновацияларға және студенттердің практикалық дайындықтарына бағытталған заманауи білім беру орталығы ретіндегі мәртебесін одан әрі күшейтті.