Қорытынды: Маңғыстаудағы делдалдық схемаларды тергеу жөніндегі өңірлік комиссия сауда үстемесін арттыру бойынша 134 жағдайды тоқтатты

ҚР СИМ Маңғыстау облысы бойынша Сауда және тұтынушылардың құқықтарын қорғау департаменті сауда қызметін реттеу саласындағы биылғы жұмысын қорытындылады. Өңірде сауда саласындағы заң бұзушылықтармен күресу және ауылшаруашылық өнімдері жәрмеңкелерін дамыту мақсатында көптеген іс-шаралар өтті.

Аталған кезеңде азық-түлік тауарларына баға белгілеу бойынша делдалдық схемаларды тергеу жөніндегі өңірлік  комиссияның 67 отырысы өткізілді, оның барысында әлеуметтік маңызы бар азық-түлік тауарларын сату кезінде сауда үстемесін арттырудың 134 факті анықталды. Департамент ұсынған ақпарат негізінде сауда субъектілеріне әкімшілік шаралар қолданылды.

Департамент осы бағытта комиссия мүшелерімен белсенді жұмыс істеп келеді. Бұл әлеуметтік тағамдар бағасының негізсіз көтерілуін анықтап, болашақта осындай жағдайлардың алдын алуға мүмкіндік береді.

Биыл Маңғыстауда 49 жәрмеңке өтті, онда 245 тоннадан астам ауылшаруашылық өнімі сатылды. Оның ішінде ет, балық, сүт өнімдері, көкөніс, жемістер, жұмыртқа және басқа да тауарлар бар. Жәрмеңкелерге Ақтау қаласы мен Маңғыстау облысының 30-дан астам тауар өндірушісі қатысты. Бұл ауыл шаруашылығы саудасын дамытуға және халық үшін қолжетімді тауарлар ассортиментін кеңейтуге елеулі үлес қосады.