ШҚО-ның 120 өндірушілері, көтерме саудагерлері мен ірі кәсіпорындары жадынамалар алды

Шығыс Қазақстан облысының Сауда департаменті облыстың қалалары мен аудандарының әкімдіктерімен бірлесіп өңірде әлеуметтік маңызы бар азық-түлік тауарларын сататын өндірушілермен және көтерме жеткізушілермен профилактикалық және түсіндіру жұмыстарын жүргізді. Мемлекеттік органдардың қызметкерлері өндірушілерге, көтерме жеткізушілерге және азық-түлік тауарларын өткізетін кәсіпорындарға "сауда қызметін реттеу туралы" Қазақстан Республикасының Заңына сәйкес шекті сауда үстемесінің рұқсат етілген мөлшері өндірушінің сату бағасының немесе көтерме жеткізушінің сатып алу бағасының он бес пайызынан аспауға тиіс екенін еске салды. Мемлекеттік органдардың қызметкерлері осы талап бұзылған жағдайда ішкі сауда субъектісі Қазақстан Республикасының заңдарына сәйкес жауапты болатындығы туралы жадынамалар табыс етті.

Жадынамалармен облыста әлеуметтік маңызы бар азық-түлік тауарларын сататын 120-ден астам өндірушілер, көтерме саудагерлер және ірі кәсіпорындар таныстырылды. Сондай-ақ, жадынамалар жергілікті газеттерде және ШҚО қалалары мен аудандары әкімдіктері мен кәсіпкерлік бөлімдерінің ресми сайттарында жарияланды.

Бұл жұмыс ӘМАТ бағасын тұрақтандыруға бағытталған және тұрақты негізде жүргізілетін болады.