Жол төсемінің беріктігі асфальт төселгенге дейін тексеріледі

Былтыр сәуір айында Президент Қасым-Жомарт Тоқаев өзінің Twitter-дегі парақшасында елдегі жолдардың жағдайын сынаған болатын. Мемлекет басшысы республикалық және жергілікті жолдардың жағдайына қатысты азаматтардың айтып жүрген сыны орынды екенін жеткізді.

«Сапасыз жасалған жол жыл сайын жөндеуді қажет етеді және бұған мемлекеттің қаржысы тиімсіз жұмсалып жатыр», - деп алға тартып, Үкіметке, әкімдер мен құқық қорғау органдарына жағдайды реттеу үшін жүйелі шаралар қабылдап, оның есебін беруді тапсырды.

Мемлекет басшысының тапсырмасы бойынша былтыр 12 желтоқсанда орындалатын жұмыстардың сапасын арттыруға және автожолдардың жағдайын жақсартуға бағытталған жүйелі шаралардың кешенді жоспары бекітілді. Оның аясында отандық ғалымдар жол жабынының сапасын арттыру бойынша тың әдістер әзірлей бастады. Мәселен, ҚазжолҒЗИ мамандары биылдан бастап асфальтбетон қоспасын төсемес бұрын зертханаларда тексеріп, ауыр салмақты көліктердің салдарынан болатын жолтабандардың пайда болуының алдын алуда.