Округтегі су құбыры желілерінің жалпы ұзындығы 93,4 км құрайды. Елді мекендердің 99,81%-ы жерасты су көздерімен, 0,19%-ы жерүсті су көздерімен қамтамасыз етілген.
Су құбыры желілерінің пайдалану мерзімі 17 жылдан астам, яғни нормативтік қызмет ету мерзімінен жоғары. Желілердің тозу деңгейі 50%-ды құрайды. Күрделі жөндеуді қажет ететін елді мекенішілік су құбыры желілерінің ұзындығы 44,2 км.
Су құбыры желілеріндегі нақты су шығыны 20%-ды құрайды.
Округ құрамында жалпы саны 8 200-ден астам адамды қамтитын 9 елді мекен бар.
2025 жылы Шеңгелді топтық су құбырының желілерін реконструкциялау бойынша жобалық-сметалық құжаттама әзірленді. Жобаның жалпы құны 3 млрд 7 млн теңгені құрайды.
Округтегі елді мекенішілік электр беру желілерінің жалпы ұзындығы 262,9 км құрайды. Электр желілеріндегі жабдықтардың техникалық тозу деңгейі 60,2%-ды құрайды.
2024 жылы Шеңгелді ауылындағы М. Өзтүрік, Астана және Қ. Рысқұлбеков көшелерінің бойына ұзындығы 2 000 метр электр желілері мен тіректер орнатылды. Сонымен қатар, қуаты 160 кВА болатын ТП-2544 күштік трансформаторына жөндеу жұмыстары жүргізілді.
Сондай-ақ, 2024 жылы Шеңгелді ауылындағы Бейбітшілік, Алдабергенова және Тәуелсіздік көшелерінің бойына 1 000 метр электр беру желісі тартылып, қуаты 160 кВА болатын күштік трансформатор орнатылды.
2026 жылы Шеңгелді ауылындағы Айымбетов көшесінде 38 электр бағанасы және 4 км электр беру желісі ауыстырылды.
Электрмен жабдықтаудың сенімділігі мен тиімділігін арттыру мақсатында Шеңгелді ауылындағы Айымбетов көшесінің бір бөлігін, сондай-ақ Т. Бокин және Бақтыбай ақын көшелерін тұрақты электр энергиясымен қамтамасыз ету үшін қуаты 250 кВА трансформаторлық қосалқы станция орнатылуда.