Пенитенциарлық мекемелерде бейнебақылауды бүлдіргені үшін қылмыстық жауаптылық енгізілді.

Норма 428-1-бапта «Қылмыстық-атқару (пенитенциарлық) жүйесі мекемелерінде, тергеу изоляторларында, уақытша ұстау изоляторларында бейнебақылау жүйесін, сол сияқты оның компоненттерін қасақана жою немесе бүлдіру» көзделген. Бап ағымдағы жылдың шілдесінде заңды күшіне енді және пенитенциарлық мекемелерде жаппай бейнебақылау жүйесінің сақталуына бағытталған.

Баптың санкциясы алты айдан жеті жылға дейін бас бостандығынан айыру жазасын қарастырады және сотталғандарды да, мекеме қызметкерлерін де қылмыстық жауаптылыққа тартуды қарастырады.

ҚАЖК айтқандай, бұл норманы енгізу қажеттілігі республиканың барлық колонияларында жаппай бейнебақылауды енгізумен байланысты болды. Ведомство бейнебақылау жүйесін бүлдіргені үшін қылмыстық жауаптылықтан басқа азаматтық-құқықтық өріс шеңберінде залалды өтеуді қарау үшін сотқа талап-арыздар жіберілетінін айтты. Сарапшылардың пікірінше, бұл шара тәулік бойы бақылауға қанағаттанбайтын қамаудағы адамдарды тәртіпке келтіреді.

Естеріңізге сала кетейік, Мемлекет басшысының Жолдауы аясында республиканың пенитенциарлық мекемелерінде барлық «көрінбейтін аймақтарды» болдырмайтынжаппай бейнебақылау енгізу туралы тапсырма берілді. Тапсырманы орындау аясында еліміздің колонияларында прокуратура органдарына, аумақтық департаменттерге және ҚАЖК-ге интеграцияланған қырық мыңға жуық бейнебақылау камералары орнатылды.