Алматы қаласы бойынша ҚАЖД ЛА-155/6 мекемесінде Халықаралық шахмат күніне орай турнир ұйымдастырылды

Алматы қаласы бойынша ҚАЖД ЛА-155/6 мекемесінде өткізілген шахмат турнирі сотталған жасөспірімдер үшін нағыз қызу «айқас» алаңына айналды. «Жас Отан» жастар қанаты Алматы қалалық филиалының жастары ат салысқан жарыс Халықаралық шахмат күніне орай ұйымдастырылды.
Аталған балалар колониясында шахмат ойынынан шебер жастар көп. Олар жарыс алдында өздерінің шеберліктерін шыңдай түсу үшін демалыс уақыттарының көбін шахмат тақтайының алдында өткізді. Осындай тыңғылықты дайындықтың нәтижесінде шахмат жарысы өте тартысты өтіп, шахматшылардың әрқайсысы жарыс жалауын қолдан бермеуге тырысып бақты.
Шахмат жарысына жиырма алты бала қатысып, олардың ішінен жүлделі орын алғандарға «Жас Отан» жастар қанаты Алматы қалалық филиалы төрағасының атынан Грамота беріліп, барлық қатысушылар төрағаның Алғыс хатына ие болды.