Әбілқайыр Сқақов облыстық мәслихат депутаттарының алдында есеп берді
Облыстық мәслихаттың кезекті сессиясында өңір басшысы жергілікті атқарушы органдардың жұмысы туралы есеп берді және Павлодар облысындағы COVID-19 ауруының болуы мүмкін жаңа толқынына дайындық туралы айтты.
Әбілқайыр Сқақов есепті кезеңде бюджет шығыстары түбегейлі қайта қаралғанын еске салды. Жыл басынан бері облыста оңтайландырудың төрт кезеңі өткізілді, басым емес шығындар қысқартылды және 16 миллиард теңгеден астам қаражат босатылды.
- Облыстың резервтік қорын толықтыру үшін ресурстар жұмылдырылды. Үкімет резервтік қордың көлемін өз кірістерінен 2% - дан 10% - ға дейін ұлғайту туралы ұсынысты қолдады. Нәтижесінде резерв көлемі 3 есеге жуық ұлғайтылып, 2 миллиард теңгеге дейін жеткізілді. Үкімет резервінен шамамен 1 миллиард теңге бөлу қосымша қолдау болды, - деп есеп берді әкім. - 1 миллиард теңгеден астам қаражатқа жеке қорғаныс құралдары сатып алынды, 7 оттегі станциясы, 300 оттегі концентраты, 77 ӨЖЖ аппараты және 21 төсек жанындағы монитор сатып алынды.
Аурудың болуы мүмкін жаңа толқынына дайындалу барысында Павлодар облысында провизорлық госпитальдар үшін қосымша оттегі станциялары, рентген және виброакустикалық аппараттар, пульсоксиметрлер және Бобров аппараттары сатып алынуда. Үкімет резерві есебінен облысқа 139 ӨЖЖ аппаратын және 3 жылжымалы кешен жеткізу жоспарланып отыр.
- Біз жедел жәрдем станциялары үшін 39 реанимобильдің жеткізілуін күтіп отырмыз, - деді өңір басшысы. - Павлодарда «Жұмыспен қамту жол картасы» бойынша қаражатты үнемдеу есебінен тез тұрғызылатын құрылымдардан аурухана құрылысы басталды. Жыл соңына дейін Сұлтанов атындағы облыстық аурухана жанынан 60 төсек-орынға арналған жұқпалы аурулар бөлімшесінің жаңа корпусы және бірінші қалалық аурухананың қабылдау бөлімі салынады.
Павлодар облысының ірі өнеркәсіптік кәсіпорындары жұмысшыларды қысқартуға жол бермеді және штаттық режимде жұмыс істеуді жалғастыруда. 51 мың кәсіпкер салықтық жеңілдіктерге ие болды, 674 ШОБ субъектілеріне несие төлеу әзірге тоқтатылды, 7 мыңнан астам кәсіпкер субсидия және жеңілдетілген несие түрінде мемлекеттік қолдау алды. Бизнесті несиелеудің жалпы көлемі 46 млрд теңгеден астам соманы құрады.
Жаңа оқу жылына келетін болсақ, Павлодар облысындағы 173 мектеп қашықтықтан, ал ауылдық жерлердегі 183 оқу орны санитарлық нормаларды сақтай отырып, әдеттегі нысанда жұмыс істейтін болады. Мектептердің компьютерлік паркінде 22 мың компьютер бар, қосымша 18 мыңға жуық компьютер сатып алынуда. Компьютерлерге мұқтаж педагогтар мен оқушылар олармен қамтамасыз етілетін болады.
- Біз 2021-2023 жылдарға арналған облыстық бюджет жобасын қолға алдық, - деп есебін жалғастырды Әбілқайыр Сқақов. - Дәстүрлі түрде бюджет әлеуметтік бағыттылықты сақтайды. Биыл біз өзімізге әлеуметтік осал топтар мен ерекше қажеттіліктері бар тұрғындарды қолдау бойынша қосымша міндеттемелер алдық. 18 жасқа дейінгі мүгедек балаларды тәрбиелеп отырған отбасылар алғаш рет әлеуметтік бейімдеу мен оңалтуға 20 АЕК мөлшерінде біржолғы төлем ала бастады. Бүгінде оны 2 628 отбасы алды. Көру қабілеті нашар мүгедектерді тифлотехникалық құралдармен қамтамасыз ету жөніндегі көпжылдық проблеманы шешу үшін қаражат бөлінді.
Облыс әкімі жыл соңына дейін жергілікті атқарушы органдар өздерінің күш-жігерін бес басты міндетті шешуге жұмылдыратынын атап өтті. Бұл барлық жоспарлы көрсеткіштерге қол жеткізу және мемлекеттік бағдарламалардың индикаторларын орындау, әлеуметтік салада, құрылыста және инфрақұрылымды жаңғыртуда басталған жобаларды аяқтау, шағын және орта бизнес үшін қолдау шараларын сақтау, жеке қорғаныс құралдары мен дәрілердің азаймайтын қорларын қалыптастыру, сондай-ақ жаңа инвестициялар тарту және жаңа цифрлық сервистерді дамыту.
Кейін Әбілқайыр Сқақов халық қалаулыларының сұрақтарына жауап беріп, кейіннен олар Павлодар облысы әкімінің есебін қабылдады.
Павлодар облысы әкімінің баспасөз қызметі
Суретті түсірген Валерий Бугаев