Ойнаңдар, балалар!

Облыс әкімі оқушылар мен ұстаздарды мектеп өміріндегі маңызды іс-шарамен құттықтап, спорт алаңының бос тұрмайтынына сенім білдірді.

– Балалардың спортқа деген қызығушылықтарын арттыру мақсатында Павлодар облысында барлық жағдайлар жасалған, – деді ол. – Бүгін біз талаптарға сай келетін үлкен футбол алаңын ашып жатырмыз. Меніңше, бұл балаларымыздың дағдыларын дамытып, спортта жетістіктерге жетуге көмектеседі.

Допты символикалық түрде ойынға енгізудің орнына аймақ басшысы «Ертіс» футбол клубының голкипері Серікбол Қапановтың қақпасына пенальти түсірді. Содан кейін жаңа алаңда мектеп командаларының арасында жолдастық ойын өтті.

Алаңның жалпы құны 45 миллион теңгені құрайды. Жоба бойынша тағы жасанды газон жабыны мен трибуна, стритбол және волейбол ойындарына арналған резеңкемен қапталған алаңдар, гимнастикалық кешен, жүгіруге арналған жолдар, алысқа секіруге арналған шұңқыр қарастырылған. Сонымен қатар алаң аймағы қоршалып, жарықтандырылған.