Арзандатылған ұнның өндірісі мен кадрлардың жетіспеушілігі: павлодарлық кәсіпкерлер Әбілқайыр Сқақовқа не туралы айтты

Павлодар облысының әкімі кезекті рет шағын және орта бизнес нысандарын аралау барысында кәсіпкерлермен сұхбаттасып, олардың проблемалары мен болашақ жоспарлары туралы білді.

 

«Гладиаторлар» спорт клубында өткен жылы мемлекеттік қолдаудың арқасында аумақтарын кеңейткенін айтты.  Қазір мұнда екі бірдей кең залдарда спортпен шұғылдануға болады. Клубтың жетекшісі Максим Дубовой бұдан бөлек дзюдомен шұғылдануға аранлған зал ашуды жоспарлап отырғанын айтты.     

 

- Адамдарды салауатты өмір салтына тартуға қосқан үлестеріңіз үшін алғыс айтамын, - деді Әбілқайыр Сқақов. – Адам спортсыз дами алмайтындықтан дене тәрбиесімен шұғылдану тренді сақталады. Сондықтан мұндай жобаларды қолдау қажет.   

 

«Сарыарқа» шағын ауданында өткен жылы ашылған «Даму нүктесі» балалар орталығы да спортқа ден қойып отыр. Қазір мұнда бірнеше спорт секциялары мен бала бақша жұмыс істейді. Мемлекеттік тапсырыстың есебінен бала бақшада 45 балдырған тәрибеленеді. Бала бақшаның иесі алдағы уақытта тағы да осынша баланы қабылдауды жоспарлауда. Бөбекжайдың аумағы бұған жағдай жасайды.

 

- Біздің жоба «Business Ertis» өңірлік бағдарламасының арқасында жүзеге асырылды, - деді орталықтың директоры Арман Исатаев. – Жақын арада тағы да үш кішігірім спорт залын ашқымыз келеді. Бұған сұраныс та бар.    

 

Облыс әкімі ұн тартатын кәсіпорындарға да барды. «Аслан» ЖШС бидай өңдеумен 1996 жылдан бері айналысып келеді. Содан бері мұнда наубайхана ашылып, нан-тоқаш бұйымдарының 25 түрі шығарылады. Ұнға келер болсақ, оның көп бөлігі өңірлік нарыққа, Қазақстанның басқа облыстарына да жөнелтіледі. Тапсырыс болса, өңдеушілер ұнды экспортқа да шығарады.

 

Басқа ұн тартатын кәсіпкерлер - «Группа Интер» ЖШС - өткен жылы дән өңдейтін жаңартылған кешенді іске қосты. Жобаға салынған иинвестициялар 1 миллиард теңгені құрайды. Бұл кәсіпорын әлеуметтік нанның бағасын тұрақтандыру мақсатында жасалған меморандумға қол қойған еді. Диқандар бидай дәнін жіберген соң өңдеушілер бірден арзандатылған ұн тартуды бастайды.

 

- Біз меморандумның шарттарының орындалуын қатаң қадағалаймыз, - деп атап өтті аймақ басшысы. – Біздің шаруа қожалықтары бидайды бекітілген бағамен сатады, ал, өңдеушілер өз кезегінде наубайшыларға арзандатылған ұн жібереді. Нәтижесінде әлеуметтік дүкендердің сөрелерінде әлеуметтік нанның бөлкесі 95 теңгеден  сатылады.      

 

«Проманалит» ЖШС-ің базасында аймақ басшысына экологиялық мониторингке арналған газ-сараптамалық жабдықтар таныстырылды. Мұнда өндірілген атмосфераға ұшатын қалдықтарды бақылау жүйесі облыс орталығындағы №1 және №2 ЖЭО-да және басқа да өнеркәсіптік кәсіпорындарда қолданылады.    

 

- Барлық жобаларды толықтай іске асырамыз, - дейді компанияның директоры Игорь Исупов. – Өзіміздің бірінші санаттағы жобалау институтымыз бар. Құрал-жабдықтар мен оған қажетті бағдарламаларды өзіміз шығарамыз. Өз зертханамыздың базасында сервистік қызмет көрсетеміз.   

 

Кәсіпорын басшылығы Әбілқайыр Сқақовқа кадрлардың жетіспеушілігі туралы айтты. Қазір мұнда Инновациялық Еуразия университетінің сегіз студентін жұмысқа қабылдап, болашақта оларды өз жұмысшылары ретінде даярлауға үміттеніп отыр. Әкім кәсіпкерлерге облыстың колледждерімен және жоо-ларымен қоян-қолтық жұмыс істеуге кеңес берді.   

 

- Біздің оқу орындары толық автономияға ие болып, білім беру бағдарламаларын өздігімен құрастыруға мүмкіндік алды, - деді аймақ басшысы. – Сондықтан бизнес-қауымдастық өздерінің кадрлық сұранымдарын жасап, оларды жоо-лар мен колледждерге жолдаулары керек. Кәсіпорындарда дуалды білім беру жүйесін жүзеге асыру үшін студенттерді жұмысқа қабылдап, оларды өндіріс барысында тәжірибеден өткізуге болады.

 

Төсек матрацтарын әзірлейтін «ТАВИ» ЖШС-де де Әбілқайыр Сқақовқа кадрлар мәселесі айтылды.  Мұнда күн сайын бүкіл Қазақстан бойынша сатылымға шығарылатын өнімнің 100-150 бірлігі өндіріледі. Компания Павлодар облысындағы ірі матрац өндірушілердің бірі болып табылады.

 

«Павлодар Метиз Центр» ЖШС-ің цехтарында Әбілқайыр Сқақовқа  метиз өнімдері, болат торлар мен соғылған бұйымдардың таныстырылымы өткізілді. Кәсіпорын Қазақстан бойынша бірінші болып метиздерді термодифуззиялық әдіс арқылы мырышпен қаптау құрал-жабдықтарын орнатты. Қазіргі кезде компания өндіретін өнімнің ассортиментін кеңейтуді жоспарлап, мемлекеттік қолдауға үміт артып отыр.

 

Павлодар облысы әкімінің баспасөз қызметі

Суреттерді түсірген Валерий Бугаев