Ақсу әкімі COVID-19 жұқтырған екі айлық сәбидің жағдайы туралы айтып берді

Ақсу қаласы мен ауылдық аймақтарда коронавирус инфекциясын 15 бала жұқтырған, деп  хабарлайды Рavlodarnews.kz.

Бұл туралы өңірлік коммуникациялар қызметі онлайн форматта өткізген баспасөз конференциясында Ақсу қаласының әкімі Балғабай Ыбыраев мәлім етті.

- Екі айлық  бала ауырып қалған анасынан жұқтырған. Бүгінгі таңда жағдайы тұрақты деп бағалануда. Енді бір аптадай жатады. Анасымен бірге тиісті ем-шараларды қабылдауда. Байланыста болған тұлғалардың шеңбері анықталды, - дейді Балғабай Ыбыраев.

Сондай-ақ  спикер ауылдық аймақтардағы эпидемиологиялық жағдайға тоқталып өтті.

- Қалқаман ауылында тәрбиеші ауырып қалған. Қалғандары - байланыста болғандар. Жеңіл дәрежеде өтіп жатқандар оқшауланып, үй карантиніне жіберілді. Қаладағы балабақша тәрбиешілері мен мен балалар да үй карантинінде, - деді Балғабай Ыбыраев.

Еске сала кетейік, 1 қарашадан бастап Ақсу қаласы мен ауылдық аймақта 91 жағдай тіркелген. Оның ішінде 12 адам - Павлодарда жұқпалы аурулар стационарында, 79 адам - үй карантинінде. Соңғы тәулікте  8 жағдай анықталған. Өсім 2,6 пайызды құрады. Бұрын ауырғандармен байланыста болғандар - 5 адам. Науқастардың ішінде 71 адам - қаладан,  12-сі ауылдық аймақтардан.


Фото: Ольга Бугаева