Михайлов ауылдық округі әкімінің 2020 жылғы мемлекеттік қызмет көрсету саласындағы қызметі туралы есебін жария талқылау қорытындысы

Қазақстан Республикасының 2013 жылғы 15 сәуірдегі «Мемлекеттік көрсетілетін қызметтер туралы» Заңының 23-бабына сәйкес аудандардың жергілікті атқарушы органдары, ауылдық округтердің әкімдері көрсетілетін қызметті берушілердің, мүдделі жеке және заңды тұлғалардың қатысуымен жылына кемінде бір рет мемлекеттік қызметтер көрсету саласындағы қызмет туралы есептерді жария талқылауды жүргізеді.

Мемлекеттік қызметтер көрсету саласындағы қызмет туралы есептерге жария талқылаулар өткізу жетекшілік ететін салада мемлекеттік қызметтер көрсету мәселелерін реттейтін жергілікті атқарушы органдар қабылдаған және жоспарлаған іс-шаралар туралы халықты хабардар етуге бағытталған. Жария талқылаулар көрсетілетін қызметті берушілер қызметінің есептілігі мен ашықтығы, мемлекеттік қызметтердің сапасы мен қолжетімділігі, мемлекеттік қызметтер көрсету процесін тұрақты жетілдіру, оларды көрсетудің үнемділігі мен тиімділігі қағидаттарын іске асыруды қамтамасыз етуге де арналған.

Қазақстан Республикасы Үкіметінің 2020 жылғы 03 сәуірдегі № 165 қаулысымен бекітілген Мемлекеттік көрсетілетін қызметтер тізіліміне сәйкес «Железин ауданы Михайлов ауылдық округі әкімінің аппараты» ММ-сы 2020 жылы мемлекеттік қызметтің 4 түрін көрсетті.

2020 жылы халыққа барлығы 19 мемлекеттік қызмет көрсетілді, оның ішінде:

1) «Сауда - саттықты (конкурстарды, аукциондарды) өткізуді талап етпейтін мемлекет меншігіндегі жер учаскелеріне құқықтарды алу « - 10.

2) «Шалғайдағы ауылдық елді мекендерде тұратын балаларды жалпы білім беру ұйымдарына және кері қарай үйлеріне тегін тасымалдауды ұсыну» - 7.

3) «Бұрын жер пайдалануға берілген жер учаскесін жеке меншікке сату» - 1;

4) «Жер учаскесінің нысаналы мақсатын өзгертуге рұқсат беру» - 1.

Карантиндік шаралар кезеңінде халық арасында түсіндіру жұмыстарын жандандыру мақсатында 2020 жылы zoom арқылы онлайн форматта мемлекеттік қызметтер көрсету, бұқаралық ақпарат құралдарында мемлекеттік қызметтер көрсету тәртібі мен мерзімдері туралы мақалалар жариялау мәселелері бойынша түсіндіру жұмыстары жүргізілді.

Әкімдік ғимаратының холында қажетті құжаттар тізбесі және оларды толтыру нысандарының үлгілері бар мемлекеттік қызмет көрсету тәртібі туралы ақпараттық стенд орналастырылған.

«Ашық әкімдік» жобасын іске асыру мақсатында ауылдық округ әкімі аппаратының ғимаратында өзіне-өзі қызмет көрсету секторы бар, ол компьютермен, сканермен және принтермен жабдықталған. Өзіне-өзі қызмет көрсету бұрышы арқылы 480 адам мемлекеттік қызмет алды.

Есепті кезеңде көрсетілген мемлекеттік қызметтердің сапасына шағымдар түскен жоқ. ҚР заңнамасында мемлекеттік қызметтер көрсету саласында құқықтық қайшылықтар, сондай-ақ олқылықтар анықталған жоқ.