Қарасан ауруы

Қарасан ауруы – алдын алуға болатын қауіпті дерт!

Қарасан – ірі қара малда кездесетін аса қауіпті жұқпалы аурулардың бірі. Аурудың қоздырғышы – топырақта ұзақ жылдар сақталатын Clostridium chauvoei бактериясы. Көбінесе 6 айдан 3 жасқа дейінгі жас мал ауырады.

Аурудың негізгі белгілері:

Дене қызуының көтерілуі;

Малдың тәбетінің төмендеуі, әлсіреуі;

Аяқ, сан, жауырын немесе мойын тұсында ауырсынатын ісіктердің пайда болуы;

Ісік басқанда сықырлаған дыбыс шығуы;

Малдың ақсауы және қысқа уақыт ішінде өліп кетуі.

Қарасан өте жылдам дамиды. Сондықтан алғашқы белгілері байқалған жағдайда уақыт жоғалтпай ветеринариялық маманға хабарлау қажет.

Алдын алу жолдары:

Малды жыл сайын қарасанға қарсы вакцинациялау;

Ветеринариялық профилактикалық іс-шараларды уақытылы жүргізу;

Мал жайылымдарын санитариялық талаптарға сай пайдалану;

Өлген малды ветеринариялық талаптарға сәйкес жою;

Жаңадан әкелінген малды ветеринариялық тексеруден өткізу.

Қарасанның емі көбіне нәтиже бермейтіндіктен, ең тиімді қорғаныс – уақтылы вакцинация және алдын алу шаралары.

Малдың саулығы – шаруашылықтың берекесі. Әрбір мал иесін ветеринариялық талаптарды сақтауға және профилактикалық екпелерден бас тартпауға шақырамыз.