Өндіріс объектілеріне есептік нөмір беру тәртібі

Жануар шаруашылығы және ветеринария саласындағы кәсіпорындардың қызметін ашықтықпен жүргізу және есепке алу мақсатында Қазақстан Республикасы Ауыл шаруашылығы министрлігі өндіріс объектілеріне есептік нөмірлер беру Қағидаларын бекітті. Есептік нөмірлер жануарларды өсіруді, дайындауды (союды), сақтауды, қайта өңдеуді және өткізуді жүзеге асыратын объектілерге, сондай-ақ жануар тектес өнімдер мен шикізатқа, ветеринариялық препараттарды, жем-шөп пен жемшөптік қоспаларды өндіру, сақтау және өткізумен айналысатын ұйымдарға міндетті түрде беріледі.

Есептік нөмір – объектінің қызмет түрі мен реттік нөмірін қамтитын бірегей код. Оның болуы бірыңғай электрондық тізілімді жүргізуге, мемлекеттік ветеринариялық бақылау мен қадағалауды қамтамасыз етуге, сондай-ақ жануар тектес өнімдердің экспорттық-импорттық рәсімдерін жеңілдетуге мүмкіндік береді.

Есептік нөмір алу үшін жеке және заңды тұлғалар «электрондық үкімет» порталы eGov.kz арқылы электрондық цифрлық қолтаңбамен расталған өтінім береді. Қажетті деректер – субъектіні тіркеу, өндірістік ғимараттардың болуы және ветеринариялық-санитариялық қорытынды – мемлекеттік ақпараттық жүйелерден автоматты түрде алынады. Өтінімді қарау мерзімі екі жұмыс күнін құрайды, ал нәтиже өтініш берушінің жеке кабинетіне жолданады. Міндетті талаптардың бірі – өтінім берілген күннен отыз күннен аспаған мерзімде берілген ветеринариялық-санитариялық қорытындының болуы.

Есептік нөмірлер объектінің қызмет ету мерзіміне беріледі, ал сою алаңдарына бір жылға ғана рәсімделіп, жыл сайын расталып отырады. Өндірістік ғимараттарды жалдау немесе өтеусіз пайдалану шартымен жұмыс істейтін өндірістік нысандарға есептік нөмір шарттың қолданылу мерзіміне беріледі. Атауын, меншік нысанын, иесін немесе қызмет түрін өзгерткен жағдайда жаңа өтінім беріледі, ал қызметін тоқтатқанда объектіні есептен шығару рәсімделуі тиіс.

Экспорт немесе импортты жүзеге асыратын объектілердің есептік нөміріне қосымша «Е»  таңбалары енгізіледі. Сондай-ақ, қызмет алушылардың ыңғайлылығы үшін «бір өтінім» қағидаты көзделген, яғни ветеринариялық-санитариялық қорытынды алу мен есептік нөмірді беру бір өтінім аясында қаралады. Бұл жағдайда қызмет көрсету мерзімі алты жұмыс күнін құрайды.

Мемлекеттік қызмет тек қана eGov.kz порталы арқылы электрондық түрде көрсетіледі және жануар тектес өнімдердің қауіпсіздігін арттыруға, мемлекеттік бақылау жүйесін жетілдіруге, сондай-ақ саланың экспорттық әлеуетін дамытуға бағытталған.

Аталған қағидалар ҚР АШМ 2015 жылғы 21 қаңтардағы №7-1/37 бұйрығымен бекітілген.