Павлодарлықтар сатып алған жаңа көлігін бірден автосалонда тіркей алады

Енді автосалоннан жаңа көлік алатын тұтынушыларға көліктерін мамандандырылған ХҚО-ға барып тіркеудің қажеті жоқ.

Автокөлікті тіркеп, мемлекеттік нөмірді таңдап, техпаспортты тікелей автосалонда ресімдей аласыз. Мемлекеттік корпорацияның қызметкері "Hyundai Pavlodar" автосалонында қызмет көрсетеді. «Жаңа көлік сатып алғанда азаматтар мамандандырылған ХҚО-ға баруы керек болатын. Енді уақыт кетіріп МХҚО-ға барудың қажеті жоқ. Біздің қызметкеріміз авсалонда жұмыс күндері сағат 9.00- ден 17.00-ге дейін қабылдайды. Бүгін павлодарлық Анастасия Борисовская бұл қызметпен алғаш болып пайдаланды. Темір тұлпар құтты болсын!», - дейді «Азаматтарға арналған үкіметтің» Павлодар облысы бойынша филиалының директоры Асылбек Сапарбекұлы.

Айта кетейік, жүргізуші куәлігін ауыстыруға, автокөлікті қайта ресімдеуге, нөмірлік белгіні таңдауға, есепке қоюға, мемлекеттік нөмірді жеткізуді ресімдеуге eGov.kz  порталында, Кaspi.kz және Halyk Homebank мобильді қосымшаларында жүзеге асыруға болады.

Анықтама: 

"Hyundai Pavlodar" автосалон мекенжайы: Павлодар қаласы, Орталық 151/1 өнеркәсіптік аймағы.