Қызылшаның алдын алу

    Қызылша – жіті жұқпалы ауру, оның ерекше белгілері тән бөртпе, сонымен қатар көз конъюнктивасының және жоғарғы тыныс жолдарының шырышты қабығының зақымдалуы.Қызылша – ауа тамшылары арқылы таралатын вирустық инфекция. Қызылша вирусы ағзаға жоғарғы тыныс жолдарының шырышты қабаты арқылы енеді, сол жерден қан арқылы бүкіл денеге таралады. Вирус тері жасушаларын, көздің шырышты қабаттарын, тыныс алу жолдарын және ауыз қуысын таңдамалы түрде зақымдайды, бұл аурудың типтік көріністерін тудырады.

  Ауру жедел түрде жалпы интоксикация белгілерімен басталады: температура 38°С және одан жоғары көтеріледі, тәбет пен ұйқы бұзылады, енжарлық, бас ауруы, ашушаңдық пайда болады. Аурудың алғашқы сағаттарында мұрыннан су ағуы, түшкіру және құрғақ, дөрекі, үрген жөтел пайда болады. Дауыс қарлығады, конъюнктивит дамиды.

  Инфекцияның жалғыз көзі – науқас адам. Вирус түшкіргенде, жөтелгенде немесе сілекей тамшыларымен сөйлескенде пайда болады.

  Қызылша жүкті әйелдерде қызылша ауруы кезінде бронхит, пневмония, көздің қасаң қабығының, орталық жүйке жүйесінің зақымдануы (энцефалит, менингоэнцефалит), түсік түсіру және ұрықтың даму патологиясы сияқты асқынуларымен қауіпті.

  Қызылшаға қарсы вакцина кеңінен қолданылғанға дейін 95% жағдай 16 жасқа дейінгі балаларда болған. Балаларды жаппай вакцинациялаудан кейін қызылшамен сырқаттанушылықтың айтарлықтай төмендеуі байқалды, алайда жекелеген жағдайлар мен шектеулі ошақтар үнемі байқалып отырды, қазіргі уақытта олардың көбею үрдісі байқалады.

  Тіпті ең мұқият гигиена инфекциядан қорғауға кепілдік бермейді. Қызылша вирусы өте жұқпалы, адамнан адамға оңай жұғады және ауада 2 сағат бойы сақталады. Инфекциямен күресудің ең күшті, қол жетімді және тиімді әдісі - вакцинация.