GOV.KZ – Мемлекеттік органдардың цифрлық ресурстарының бірыңғай платформасы
Республика күніне орай Павлодар облысы Аққулы ауданында өскелең ұрпақтың шығармашылық қабілетін шыңдап, өнерге деген сүйіспеншілігін арттыруды мақсат еткен аудандық балалар шығармашылығының «Шабыт» байқау-фестивалі ұйымдастырылды.
Өнер мерекесіне аудан мектептерінің талантты оқушылары қатысып, өздерінің шығармашылық әлеуетін, сахналық шеберлігі мен орындаушылық қабілеттерін ортаға салды. Байқау жас дарындардың өнерін шыңдап қана қоймай, олардың өзара тәжірибе алмасуына, ұлттық мәдениет пен өнерді дәріптеуіне мүмкіндік берді.
Фестиваль бірнеше бағыт бойынша өткізілді. Атап айтқанда, «Ән қанатында», «Би әлемінде» және «Ансамбль» бағыттары бойынша қатысушылар өз өнерлерін көрсетіп, көрермендердің ыстық ықыласына бөленді. Әсем ән мен мың бұралған би, үйлесімді ансамбльдік орындаулар байқаудың көркін аша түсті.
Байқау барысында қатысушылардың орындаушылық шеберлігі, сахна мәдениеті, шығармашылық ізденісі мен өнер көрсету деңгейі бағаланды. Әрбір өнерпаздың сахнаға деген құлшынысы мен дайындығы олардың өнерге деген қызығушылығының жоғары екенін көрсетті.
Фестивальдің қорытындысы бойынша жалпы командалық есепте бірінші орынды екі жыл қатарынан Шәмші бастауыш мектебі иеленді. Бұл – мектеп ұжымы мен оқушыларының жүйелі еңбегінің, шығармашылық ізденісінің және өнерге деген шынайы сүйіспеншілігінің жемісі.
«Шабыт» байқау-фестивалі – балалардың бойындағы талантты танытып, шығармашылық мүмкіндіктерін кеңейтуге жол ашатын маңызды мәдени іс-шара. Осындай өнер додалары жас ұрпақтың рухани дамуына, ұлттық құндылықтарды құрметтеуіне және өз қабілеттеріне деген сенімін арттыруға ықпал етеді.
Өнерлі өрендердің алар асуы биік, шығармашылық жолдары жарқын болсын! Шабыттарыңыз шалқып, өнерлеріңіз өрлей берсін!
2026 жылғы 13–17 қазан аралығында Астана қаласында ерекше білім беру қажеттіліктері бар балалар арасында «Жұлдызай» Ұлттық инклюзивті ойындары өтті.
Республикалық жарысқа Павлодар облысының 6 арнайы мектебінің тәрбиеленушілері қатысып, жоғары дайындық деңгейі мен жеңіске деген жігерін көрсетті.
Жарыс қорытындысы бойынша өңір спортшылары 19 медаль иеленді: 6 алтын, 8 күміс және 5 қола.
Жүлдегерлер үстел теннисі, тоғызқұмалақ, жеңіл атлетика және шоудаун спорт түрлері бойынша бақ сынады.
№4 арнайы мектептің тәрбиеленушілері үстел теннисі мен тоғызқұмалақтан, №5 арнайы мектептің спортшылары төрт медаль, №1 арнайы мектептің тәрбиеленушілері екі жүлде, ал №7 арнайы мектептің спортшылары шоудаун мен тоғызқұмалақтан жүлделі орындарға ие болды.
№3 арнайы мектептің тәрбиеленушісі Анастасия Анохина 30 метрге жүгіруден алтын медаль жеңіп алып, «Жұлдызай» республикалық инклюзивті ойындарының үш дүркін чемпионы атанды.
Бұл жетістіктер – жас спортшылардың табандылығы мен еңбегінің, сондай-ақ педагогтер мен жаттықтырушылардың жүйелі жұмысының нәтижесі.
Жеңімпаздар мен жүлдегерлерді, педагогтер мен жаттықтырушыларды құттықтаймыз! Барша спортшыларға зор денсаулық, толағай табыс және жаңа жеңістер тілейміз!
Қазіргі таңда білім беру саласы қарқынды дамып, жаңа технологиялар мен инновациялық әдістер оқу үдерісіне кеңінен енгізілуде. Соның ішінде жасанды интеллект мұғалімнің кәсіби дамуына, сабақ сапасын арттыруға және оқушылардың білім алуға деген қызығушылығын оятуға мүмкіндік беретін заманауи құралдардың біріне айналды.
Жас маман үшін ұстаздық жол – үздіксіз ізденіс пен тәжірибе жинақтаудың, білімін жетілдіру мен кәсіби шеберлігін шыңдаудың маңызды кезеңі. Бұл жолда заман талабына сай жаңашылдықтарды меңгеріп, оларды тәжірибеде тиімді қолдана білу ерекше мәнге ие.
Осы бағытта Павлодар облысы Ертіс ауданы Қызылқақ орта мектебінің жас маманы Айгерім Асаинқызы да кәсіби дамуға ерекше көңіл бөліп келеді. Астана қаласында жасанды интеллект бойынша арнайы курстан өтіп, білім беру үдерісінде заманауи технологияларды қолдану жолдарын меңгерді. Қазіргі уақытта алған білімін тәжірибеде пайдаланып, жасанды интеллект мүмкіндіктерін сабақ барысында тиімді қолдануда.
Жасанды интеллект мұғалімге сабақ жоспарларын түрлендіруге, оқу тапсырмаларын оқушылардың жас ерекшеліктері мен білім деңгейіне сәйкес бейімдеуге, шығармашылық жұмыстарды ұйымдастыруға және сабақ мазмұнын қызықты етуге көмектеседі. Сонымен қатар мұндай технологиялар мұғалімнің уақытын тиімді пайдалануына және оқыту әдістерін жетілдіруіне ықпал етеді.
Дегенмен, жасанды интеллект мұғалімді алмастыратын құрал емес, керісінше, оның кәсіби мүмкіндіктерін кеңейтетін көмекші ресурс болып табылады. Білім берудегі басты құндылық – ұстаздың білімі, тәжірибесі, адамгершілігі мен әрбір оқушының қабілетін ашуға деген ұмтылысы. Сондықтан жасанды интеллектті орынды әрі жауапкершілікпен қолдану маңызды.
«Болашақтың ұстазы – білімін үнемі жаңартып, заман талабына бейімделе алатын, әр баланың мүмкіндігіне сенетін тұлға». Бұл қағида жас мамандардың кәсіби қалыптасуы мен дамуының негізгі бағыттарының бірі болуы тиіс.
Бас жүлде, жүлделі орындар және жарқын өнер көрсетілімдері! Музыкалық колледж студенттері 2026 жылғы 16–18 қазан аралығында Семей қаласында Ғабдулхақ Ғабдуллаұлы Ахунжановтың 75 жылдығына арналған татар өнерінің XXVII халықаралық «Көзге Иртыш моңнары» фестиваль-байқауында жоғары нәтижелерге қол жеткізді.
Фестиваль Ресейдің әртүрлі қалалары мен ТМД елдерінің өкілдерін, соның ішінде Омбы, Томск, Қазан және Новосибирск қалаларының қатысушыларын біріктірді. Байқау бағдарламасы көркемсөз оқу, аспаптық орындау, би, вокал, сәндік-қолданбалы өнер және бейнелеу өнері бағыттарын қамтыды.
Павлодар қаласының музыкалық колледж студенттері оқу орнының абыройын асқақтатып, жоғары орындаушылық шеберліктері мен кәсіби дайындықтарын көрсетті.
«Соло» номинациясында Томирис Тюлюбаева II орынға ие болды. Жетекшісі — О. М. Бейсаров.
«Ансамбльдер» номинациясында Анна Выгас пен Томирис Смагуловадан құралған «Два тембра» вокалдық дуэті III орынды иеленді. Жетекшісі — О. В. Петрушкина.
Фестивальдің ең жоғары марапаты — Бас жүлдеге (Гран-при) ие болған орыс халық аспаптары оркестрінің жеңісі ерекше қуанышқа бөледі! Оркестр жетекшісі — Қазақстан Республикасының еңбек сіңірген қайраткері В. П. Денисенко.
Бұл жетістіктер — студенттердің табанды еңбегінің, ұстаздардың кәсіби шеберлігінің және музыкалық өнерге деген шынайы сүйіспеншілігінің нәтижесі. Әрбір марапат таланттың, мақсатқа ұмтылыстың және шығармашылық ізденістің айқын дәлелі болды.
Жеңімпаздарымызды, оркестр қатысушыларын және олардың ұстаздарын шын жүректен құттықтаймыз! Шығармашылық шабыт, жаңа белестер және алдағы байқауларда жарқын жеңістер тілейміз!
Музыка жүректерді біріктіреді, ал талант жаңа көкжиектерге жол ашады!
Қазіргі білім беру жүйесінде жас мамандардың кәсіби құзыреттілігін қалыптастыру, педагогикалық шеберлігін жетілдіру және сапалы білім беруді қамтамасыз ету маңызды бағыттардың бірі болып табылады.
Осы бағытта Павлодар облысы Ертіс ауданының №1 Ертіс орта мектебінде жаратылыстану-математикалық цикл пәндері бойынша жүйелі әдістемелік жұмыстар жүргізілуде. Әдістемелік бірлестікті Алтынгүл Майданқызы Ауталипова басқарады.
Бірлестік құрамындағы физика, химия, биология, география, математика және информатика пәндерінің мұғалімдері жас педагогтерге әдістемелік қолдау көрсетіп, олардың кәсіби қалыптасуына және педагогикалық тәжірибесін жетілдіруіне ықпал етуде.
Мектепте география пәнінің жас маманы Нуртазин Мақсат Сарсенбайұлы, математика пәнінің жас мамандары Кусанова Мадина Азаматқызы мен Гостищева Айслу Қайыржанқызы кәсіби білімдері мен дағдыларын жетілдіріп, педагогикалық қызметтерін дамыту бағытында жұмыс жүргізуде.
Әдістемелік бірлестік аясында тәжірибе алмасу, өзара сабаққа қатысу, ашық сабақтар өткізу, оқу тапсырмаларын әзірлеу және оқушылардың білім жетістіктерін талдау жұмыстарына ерекше мән беріледі. Бұл жұмыстар жас мамандардың заманауи оқыту әдістерін меңгеруіне, сабақтарды тиімді ұйымдастыруына және кәсіби құзыреттілігін арттыруына мүмкіндік береді.
Сабақ барысында теориялық білімді тәжірибемен ұштастыру, оқушылардың функционалдық сауаттылығын, сыни ойлауын және зерттеушілік дағдыларын дамыту көзделеді. Осы мақсатта практикалық тапсырмалар, цифрлық білім беру ресурстары, STEM элементтері мен заманауи педагогикалық технологиялар қолданылады.
Тәжірибелі ұстаздардың әдістемелік қолдауы мен жас мамандардың кәсіби ізденісі – білім беру сапасын арттырудың маңызды алғышарты. Өзара ынтымақтастық пен үздіксіз кәсіби даму арқылы педагогтердің әлеуеті артып, оқушылардың сапалы білім алуына қолайлы жағдай қалыптасады.
Ортақ мақсат – жас мамандарды қолдау, озық педагогикалық тәжірибені тарату және білім сапасын арттыру.
Павлодар облысы Май ауданында шағын жинақты мектеп оқушыларының білім сапасын арттыруға бағытталған ресурстық орталықтың алғашқы оқу сессиясы өтті.
Үш күн бойы ауданның шағын жинақты мектептерінің 10–11-сынып оқушылары Көктөбе тірек мектебінде білім алып, жаратылыстану-математикалық бағыттағы пәндер бойынша білімдерін тереңдетіп, тәжірибелік дағдыларын жетілдірді.
Оқу сессиясының негізгі мақсаты – оқушылардың біліміндегі олқылықтарды толықтыру, пәндік білім деңгейін көтеру және сапалы білім алуға тең мүмкіндік қалыптастыру. Тірек мектеп базасында ұйымдастырылған сабақтар оқушылардың пәндерге деген қызығушылығын арттырып, қорытынды аттестаттау мен алдағы маңызды сынақтарға дайындалуына ықпал етеді.
Сонымен қатар, оқушыларға арналған психологиялық тренингтер өткізіліп, болашақ мамандықты саналы түрде таңдауға бағытталған жұмыстар жүргізілді. Бұл шаралар жасөспірімдердің өз қабілеттерін тануына, кәсіби бағдарын айқындауына және алдағы өмірлік мақсаттарын белгілеуіне мүмкіндік берді.
Ресурстық орталық жұмысы – ауыл мектептері арасындағы білім сапасын теңестіруге, әрбір оқушының әлеуетін ашуға және сапалы білімге қолжетімділікті қамтамасыз етуге бағытталған маңызды қадам.
Павлодар облысы Аққулы ауданында отбасы құндылықтарын дәріптеуге, ата-ана мен педагог арасындағы ынтымақтастықты нығайтуға және ұрпақ тәрбиесіндегі ортақ жауапкершілікті арттыруға бағытталған «Шәй үстіндегі тәрбие» форматындағы тағылымды кездесу өтті.
Ізгілік пен өнегені, ұлттық құндылықтар мен отбасылық тәрбиені арқау еткен шараға 50-ге жуық ата-ана, ата-аналар клубтарының мүшелері мен педагогтер қатысты. Кездесудің мақсаты – отбасы мен мектеп арасындағы байланысты нығайтып, ата-аналардың тәрбиелік әлеуетін арттыру және тәжірибе алмасуға қолайлы орта қалыптастыру.
Аталмыш шараға облыстық М.М. Катаев атындағы Оқушылар сарайының әдіскерлері Майя Темирбулатова мен Бақыт Аралбаева қатысты. Олар «Мобильді әдіскер» жобасы аясындағы көшпелі семинар-практикумға қатысып, тәрбие жұмысын ұйымдастырудың тиімді тәсілдерімен бөлісті. Жоба педагогтерге әдістемелік қолдау көрсетіп, өңірлер арасындағы тәжірибе алмасуды дамытуға бағытталған.
Семинар-практикум барысында «Тәрбие ошағы – аймақтық бағыт: бала тәрбиесіндегі өңірлік кеңістік пен отбасылық құндылықтардың ықпалдастығы» тақырыбында «Аққу» клубының үйлестірушісі Майя Темирболатова сөз сөйледі. Ол бала тәрбиесіндегі отбасы мен қоғамның рөліне, ұлттық құндылықтарды күнделікті тәрбие үдерісінде насихаттаудың маңыздылығына тоқталды. Сондай-ақ ата-аналар клубтарының жұмысы арқылы отбасы мен білім беру ұйымдары арасындағы байланысты нығайту мәселелерін қозғады.
Әдіскер Бахыт Аралбаева облыстық жобалармен таныстырды.
Қазақ халқы үшін дастарқан басындағы әңгіме – ұрпақ тәрбиесінің ерекше мектебі. Шәй үстіндегі өнегелі сөз бен үлкеннің ақылы бала бойына ізгілік пен сыйластық қасиеттерін сіңіруге ықпал етеді. Кездесу барысында ата-ана мен бала арасындағы сенім, ұлттық тәрбие, отбасындағы сыйластық және мектеппен ынтымақтастық мәселелері талқыланды.
Шара соңында ата-аналар клубтары, сондай-ақ «Аққу» және «Мирас» клубтары арнайы көрме арқылы өз жұмыстары мен тәрбиелік бастамаларын таныстырып, тәжірибе алмасты.
Мемлекеттік тілдің мәртебесін арттыру – баршамызға ортақ міндет. Павлодар облысы Май ауданында өзге ұлт өкілдерінің қазақ тілін меңгеруіне және мемлекеттік тілге деген құрметін қалыптастыруға ерекше көңіл бөлінеді.
Бүгінде аудан мектептерінде өзге ұлт өкілдерінің 115 оқушысы білім алса, оның 36-сы қазақ тілінде оқиды. Аудандағы 13 мектептің екеуінде оқыту аралас тілде жүргізіледі.
Осы бағыттағы жұмыстың жарқын нәтижесін аудан оқушылары Қазақстан Республикасы Оқу-ағарту министрлігінің «Дарын» республикалық ғылыми-практикалық орталығы ұйымдастырған «Тіл – тәуелсіздік тұғыры» республикалық олимпиадасында көрсетті.
Майтүбек мектебінің жүлдегерлері:
ІІ орын – Делолио Вадим, 5 «Б» сыныбы;
ІІ орын – Ворошилова Айлин, 7 «Б» сыныбы;
ІІІ орын – Степанова Дарья, 7 «Б» сыныбы;
ІІІ орын – Фомин Данила, 7 «Б» сыныбы.
Май мектебінің жүлдегерлері:
ІІ орын – Науметов Рамиль, 5-сынып;
ІІ орын – Виноградов Сергей, 9-сынып;
ІІ орын – Каримов Наиль, 5-сынып;
ІІІ орын – Чорноус Сергей, 7-сынып.
Оқушыларды олимпиадаға дайындаған қазақ тілі мен әдебиеті пәнінің мұғалімдері Жакупова Айжан Ахмедиевна мен Адильшина Нуржамал Бейсенбековнаға алғыс білдіреміз!
Барлық жүлдегерлерді, ұстаздары мен ата-аналарын шын жүректен құттықтаймыз!
Өзге ұлт өкілдерінің мемлекеттік тілді меңгеріп, оны құрметтеп, білім бәйгесінде жоғары нәтиже көрсетуі – баршамызға үлгі. Қазақ тілі – тек бір ұлттың емес, Қазақстанның барша азаматын біріктіретін ортақ құндылық. Оның қолданыс аясын кеңейтіп, мәртебесін көтеру әрқайсымыздың күнделікті ісімізден басталады.
Жоғары электроника және коммуникациялар колледжі базасында білім алушылардың кәсіби дағдыларын өндірістік жағдайларға барынша жақындатылған ортада қалыптастыруға бағытталған бірегей оқу-өндірістік полигонның таныстырылымы өтті.
Бұл заманауи білім беру нысаны — Павлодар өңіріндегі теміржол саласының толық инфрақұрылымымен жабдықталған жалғыз алаң. Оқу-өндірістік орталығы теміржол мен бағыттамалы бұрманы, жылжымалы құрамды, дабыл беру, орталықтандыру және бұғаттау жүйелерін, жол төсемінің конструкцияларын, сондай-ақ телекоммуникациялық байланыс желілерін қамтиды.
Алаңның ашылуы арқасында студенттер оқу процесі барысында шынайы жабдықтармен жұмыс істеу дағдыларын дамытып, практикалық шеберліктерін шыңдауға мүмкіндік алды.
Жоба колледждің әлеуметтік серіктестерінің, соның ішінде «ҚТЖ» ҰК» АҚ филиалы —«Магистральдық желінің Павлодар бөлімшесі» белсенді қолдауымен жүзеге асырылды.
Павлодар облысы Б. Ахметов атындағы жоғары педагогикалық колледжде білім беру сапасын арттыру, педагогтердің кәсіби шеберлігін жетілдіру және халықаралық ынтымақтастықты кеңейту стратегиясы жүйелі түрде жүзеге асырылуда.
Колледж дамуының негізгі көрсеткіштерінің бірі – педагогикалық ұжымның жоғары кәсіби әлеуеті. Оқытушылардың үздіксіз кәсіби дамуына, біліктілік санаттарын арттыруына, заманауи білім беру технологияларын меңгеруіне және халықаралық білім беру бастамаларына қатысуына ерекше көңіл бөлінеді.
Колледждің жеті оқытушысы жоғары біліктілік санаты «педагог-шебер» атағына ие. Бұл – ұжымның жоғары кәсіби деңгейі мен әдістемелік жұмыстың нәтижелілігін айқындайтын көрсеткіш.
Колледж қызметінің маңызды бағыттарының бірі – халықаралық жобаларға қатысу. 2024 жылдан бастап колледж педагогтер мен студенттердің құзыреттері мен көшбасшылық әлеуетін дамытуға бағытталған DARYA SCAFFOLD халықаралық жобасын жүзеге асыруға қатысуда. SCAFFOLD құралдарын қолдану болашақ педагогтердің көшбасшылық, бастамашылдық, ынтымақтастық және өз бетінше шешім қабылдау дағдыларын қалыптастыруға ықпал етеді.
Колледж педагогтері халықаралық кәсіби алаңдарда Қазақстанның атынан белсенді түрде, байқауларға, білім беру форумдарына, тәжірибе алмасу бағдарламалары мен тағылымдамаларға қатысуда.
Халықаралық ынтымақтастық аясында оқытушылар Бішкек және Ашхабад қалаларында кәсіби тағылымдамадан өтіп, білім беру іс-шараларына қатысты. Колледж ұстазының Брюссель қаласында өткен Еуропалық білім беру қорының (ETF) халықаралық іс-шарасына қатысып, SCAFFOLD құралдарын қолдану тәжірибесін таныстыруы ерекше жетістік болды.
Сонымен қатар, колледж оқытушылары басқа да халықаралық байқауларда жоғары нәтижелер көрсетіп келеді. Атап айтқанда, 2026 жылы колледж оқытушысы ETF New Learning Award аясында халықаралық INSPIRATION AWARD марапатына ие болды. Бұл марапат инновациялық білім беру тәжірибелерін табысты енгізудің және колледж педагогтерінің жоғары кәсіби деңгейінің айқын дәлелі болды.
Ұжым жұмысының кезекті маңызды кезеңі – «Ағылшын тілі мұғалімі» білім беру бағдарламасы бойынша халықаралық аккредиттеуден өту. Аккредиттеу аясында «APEC Training Center» ЖШС мамандарының қатысуымен педагогтерге арналған оқыту ұйымдастырылды. Оқытушылар курстық даярлықтан сәтті өтіп, City & Guilds халықаралық салалық аккредиттеу стандарты аясында нұсқаушы мәртебесін алу үшін біліктілік емтихандарын тапсырды.
Аккредиттеу үдерісінің келесі кезеңінде «Ағылшын тілі мұғалімі» мамандығының студенттеріне де осындай оқыту ұйымдастыру жоспарлануда.
Педагогикалық колледждің халықаралық аккредиттеуден өтуі оқытушылар мен студенттер үшін кең мүмкіндіктер ашады. Бұл олардың халықаралық деңгейде танылған сертификатталған маман болуына жол ашып, білім беру үдерісінің City & Guilds халықаралық стандартының қатаң талаптарына толық сәйкестігіне кепілдік береді.
2026 жылғы 15 қазанда колледжде аталған білім беру бағдарламасын жүзеге асыруға қатысатын оқытушыларға арналған кәсіби тренинг өтті. Іс-шара халықаралық аккредиттеудің келесі кезеңдері аясында APEC Training Center мамандарының қатысуымен ұйымдастырылды.
Тренингке сарапшылыққа халықаралық аккредиттеу жөніндегі маман Ұлпан Кемелова және ағылшын тілін оқыту саласындағы сарапшы әрі ментор Линда Смарт (Linda Smart) шақырылды.
Тренингтің мақсаты – оқытушылардың кәсіби құзыреттерін дамыту, білім беру бағдарламасын халықаралық стандарттарға сәйкес жетілдіру және аккредиттеу үдерісінде әдістемелік қолдау көрсету.