1-сыныпқа балаларды қабылдау туралы ақпарат

1 сәуірден бастап 2025 жылғы 31 тамызға дейін 1-сыныпқа қабылдау үшін өтініштер қабылданады.

Балаларды мектепке қабылдау тәртібі 2018 жылғы 12 қазандағы № 564 бұйрықпен бекітілген Типтік ережелерге сәйкес реттеледі.

1-сыныпқа білім деңгейіне қарамастан 6 жасқа толған балалар және ағымдағы күнтізбелік жылы 6 жасқа толатын балалар қабылданады. Бала білім беру ұйымының қызмет көрсету аумағында тұруы тиіс. Төмендегі құжаттар қажет:

• Өтініш
• 3х4 см өлшеміндегі 2 дана фотосурет
• № 065/у медициналық анықтама («Профилактикалық екпелер картасы»)
• № 052-2/у медициналық анықтама («Баланың денсаулық паспорты»)

ҚР Оқу-ағарту министрлігі биыл мемлекеттік қызметтің бизнес-процесін жаңартты. Енді өтініштерді «электрондық үкімет» (egov.kz) веб-порталы арқылы беруге болады:

• Мектепті автоматты түрде таңдау (Білім беру ұйымының қызмет көрсету аумағы қалалардың, астананың, аудандардың білім басқармаларының бұйрығымен бекітіледі);
• Сынып-комплект автоматты түрде қалыптастырылады;
• Білім беру ұйымымен келісімшарт электрондық форматта жасалады (1-сыныпқа қабылдау туралы бұйрық шыққаннан кейін ата-анаға білім беру ұйымымен келісімшартты танысып, қол қою үшін SMS-хабарлама жіберіледі. Бұйрық 25 тамыздан ерте шығарылмайды).

Маңызды:
Білім беру ұйымдары артық құжаттарды сұратуға құқығы жоқ. «Баланың туу туралы куәлігін» талап етуге тыйым салынады.