Табиғат аясында демалу немесе жұмыс істеу кезінде кене шағу қаупі бар. Сонымен қатар, кенелерді үйге үй жануарлары немесе дала гүлдері арқылы алып келу мүмкін.
Кенелер кене энцефалиті мен Лайм ауруы сияқты қауіпті жұқпалы аурулардың қоздырғыштарын тасымалдауы мүмкін. Алайда Ақсу өңірі кене энцефалиті бойынша эндемиялық аумаққа жатпайды, яғни бұл ауруды тарататын кене түрі біздің өңірде кездеспейді. Соған қарамастан, кене шаққаннан кейін қандай да бір мазасыз белгілер пайда болса, дереу дәрігерге қаралу қажет.
Кене шағу қаупін азайту үшін табиғатқа шығар алдында ұзын жеңді, жең ұштары қысып тұратын киім, жабық аяқ киім мен бас киім киіп, шалбардың балағын шұлықтың ішіне салып жүрген жөн. Ашық түсті киім таңдаған дұрыс, өйткені оның үстінде кенені оңай байқауға болады.
Табиғатта жүрген кезде киіміңіз бен ашық дене бөліктерін жиі тексеріп тұрыңыз, кенеге қарсы репелленттерді қолданыңыз. Серуеннен кейін үй жануарларын міндетті түрде қарап шығыңыз.
Егер кене энцефалиті бойынша эндемиялық өңірлерге баруды жоспарласаңыз, сақтық шараларын қатаң сақтаңыз. Табиғи ошақтарда жұмыс істейтін адамдарға кене энцефалитіне қарсы профилактикалық вакцинация ұсынылады.
Есіңізде болсын: қарапайым сақтық шараларын сақтау өзіңізді және жақындарыңызды кене шағуынан және онымен байланысты жұқпалы аурулардан қорғауға көмектеседі.
Ақсу қ. СЭББ бас маман И.А. Калёнова