Ауруханаішілік инфекциялар (АІИ) — пациенттерге медициналық көмек көрсету барысында немесе медицина қызметкерлерінің кәсіби қызметі кезінде пайда болатын жұқпалы аурулар.

Әдетте мұндай инфекциялар ауруханаға жатқызылғаннан кейін кемінде 48 сағат өткен соң дамиды және медициналық ұйымда болумен байланысты болады.

АІИ-дің негізгі қоздырғыштары — шартты-патогенді бактериялар мен саңырауқұлақтар. Олардың көпшілігі бактерияға қарсы препараттарға төзімді болып келеді және «ауруханалық штамдар» деп аталатын түрлерді түзеді. Инфекцияның даму қаупі катетерлерді ұзақ уақыт қолданғанда, инвазиялық ем-шаралар жүргізілгенде, хирургиялық операциялар кезінде, сондай-ақ санитариялық-эпидемияға қарсы режим сақталмаған жағдайда артады.

Ауруханаішілік инфекциялар екі негізгі топқа бөлінеді:

• Жергілікті инфекциялар — операциядан кейінгі жара инфекциялары, несеп шығару жолдарының инфекциялары, тыныс алу мүшелерінің инфекциялары (пневмония), сондай-ақ іріңді-септикалық үдерістер.
• Жайылған (генерализацияланған) инфекциялар — инфекцияның ауыр түрлері, оның ішінде септицемия және септикопиемия (сепсистің өте қауіпті, найзағайдай жылдам дамитын түрі).

Ауруханаішілік инфекциялардың алдын алу асептика және антисептика қағидаларын қатаң сақтауға, медициналық бұйымдарды сапалы стерилизациялауға, жабдықтар мен үй-жайларды уақтылы дезинфекциялауға, заманауи антисептикалық құралдарды қолдануға, сондай-ақ санитариялық-эпидемияға қарсы режимнің сақталуына тұрақты эпидемиологиялық бақылау жүргізуге негізделген.

Ауруханаішілік инфекцияларды емдеу ауруды қоздырған микроорганизмге байланысты таңдалатын антибиотиктерді қолдану арқылы жүргізіледі. Қажет болған жағдайда иммундық жүйені қолдайтын дәрілік препараттар тағайындалады.

Ақсу қ. СЭББ бөлім басшысы  К.Е. Сагитова