Халықты уақтылы хабардар ету — азаматтық қорғаудың маңызды элементтерінің бірі. Төтенше жағдай қаупі туындаған немесе төтенше жағдай болған кезде азаматтар қауіптің сипаты және одан әрі не істеу керектігі туралы нақты ақпаратты мүмкіндігінше тез алуы тиіс. Хабарлау сигналы алынғаннан кейін сабыр сақтап, ресми ақпаратпен мұқият танысу қажет. Тексерілмеген ақпаратты таратуға және түрлі қауесеттерге сенуге болмайды.
Эвакуация жүргізілген жағдайда азаматтар құтқарушылар мен басқа да уәкілетті қызметтердің талаптарын орындауы тиіс. Эвакуация алдында құжаттарды, дәрі-дәрмектерді және қажетті заттарды алып, балалардың, қарттардың және көмекке мұқтаж адамдардың қауіпсіздігін қамтамасыз ету қажет. Әр адам жақын орналасқан эвакуациялық шығу жолдары мен жиналу орындарын алдын ала білгені дұрыс. Ұйымдарда бұл мәселелер практикалық жаттығулар барысында пысықталуы қажет.
Эвакуация — дүрбелеңге себеп емес. Ұйымдасқан және сабырлы әрекет адамдардың бір-бірін итермелеуіне, жарақат алуына және басқа да қауіпті жағдайларға жол бермейді.
Есте сақтаңыз: хабарлау сигналы — жай ғана дыбыс емес. Бұл жағдайға назар аударып, өзіңізді және айналаңыздағы адамдарды қорғау үшін қажетті шараларды қабылдау туралы ескерту.
Ақсу қаласының ТЖБ инженері а/қ лейтенанты Тапалов А.Б.