Өндірістік бақылау: әр кәсіпкер білуге тиіс негізгі талаптар 2023 жылдан бастап Қазақстанда Денсаулық сақтау министрінің 2023 жылғы 7 сәуірдегі №62 бұйрығымен бекітілген «Өндірістік бақылауды жүзеге асыруға қойылатын санитариялық-эпидемиологиялық талаптар» атты жаңартылған санитариялық ережелер қолданыста. Өндірістік бақылау (өзіндік бақылау) — өнімнің, көрсетілетін қызметтердің және орындалатын жұмыстың қауіпсіздігін қамтамасыз етуге бағытталған ішкі іс-шаралар жүйесі. Оған мыналар кіреді: • өнімді және қоршаған орта факторларын зертханалық зерттеу; • еңбек жағдайы мен нысандардың санитариялық жағдайын тұрақты тексеру; • құжаттама мен есеп жүргізу. Негізгі қағида — өндірістік бақылаудың уақтылығы мен шынайылығы үшін кәсіпкердің өзі жауап береді. Кім жүргізуге міндетті? Қазақстан Республикасының «Халық денсаулығы және денсаулық сақтау жүйесі туралы» Кодексінің 51-бабы және 82-бабының 1-тармағы 4) тармақшасына сәйкес, жеке кәсіпкерлер мен заңды тұлғалар өз қызметінің түріне қарай өндірістік бақылауды жүргізуге міндетті: • Жеке кәсіпкерлер мен заңды тұлғалар өндірістік бақылау бағдарламасын әзірлеуі тиіс. • Кәсіпорында басшының бұйрығымен жауапты тұлға тағайындалады. • Бақылау кәсіпорынның жеке зертханасында немесе аккредиттелген сынақ орталығында жүргізілуі мүмкін. Өндірістік бақылау бағдарламасы нені қамтиды? Бағдарлама еркін нысанда жасалады, бірақ міндетті түрде төмендегілер болуы тиіс: 1. Осы қызмет түріне міндетті санитариялық нормалар, әдістемелер және стандарттар тізімі. 2. Медицина тексерулерінен, гигиеналық оқудан және аттестациядан өтетін қызметкерлердің тізімі. 3. Бақылауға жататын өнімдердің, қызметтердің және процестердің тізбесі. 4. Есепке алу және есептілік нысандары. 5. Ықтимал қауіп төндіретін химиялық, биологиялық және физикалық факторлардың тізімі. Маңызды: бағдарлама ҚР Кодексі мен қолданыстағы заңнама талаптарына сәйкес қайта қаралып, өзектендіріліп отыруы керек. Есеп қалай тапсырылады? Өндірістік бақылау нәтижелері санитариялық-эпидемиологиялық қызметтің аумақтық бөлімшелеріне жылына екі рет ұсынылады: • бірінші жартыжылдық үшін — 5 шілдеге дейін; • жыл қорытындысы бойынша — 5 қаңтарға дейін. Есеп белгіленген нысан бойынша (санитариялық ережелердің 2-қосымшасы) тапсырылады. Бұл бизнеске не үшін қажет? Өндірістік бақылауды уақытылы жүргізу кәсіпкерге мүмкіндік береді: • тексерулер мен айыппұлдар қаупін азайтуға; • өнім мен қызметтердің қауіпсіздігін қамтамасыз етуге; • клиенттер мен серіктестер сенімін арттыруға; • өндірістік және беделдік тәуекелдерді төмендетуге. Ақсу қалалық СЭББ бас маманы Е. Н. Гулина