ТҮРКІСТАНДА «АЛҒЫСЫМ ШЕКСІЗ, ТУҒАН ЕЛ» АТТЫ МЕРЕКЕЛІК ІС-ШАРА ӨТТІ

2025 жылдың 1 наурыз күні Түркістан қаласындағы «Достық үйінде» Қазақстан халқы Ассамблеясының 30 жылдығы аясында Алғыс айту күніне арналған «Алғысым шексіз, туған ел» атты мерекелік іс-шара өтті.

Салтанатты жиынға Түркістан облысының әкімі – облыстық Қазақстан халқы Ассамблеясының төрағасы Нұралхан Көшеров, зиялы қауым өкілдері, облыстық ҚХА мүшелері және ардагерлері, облыстық ҚХА жанындағы «Ел бірлігі» депутаттық тобының мүшелері, БАҚ өкілдері, жастар қатысты.

Мерекелік іс-шара Қазақстан халқы Ассамблеясының 30 жылдығына арналған естелік тақтаның ашылуымен басталды.

Бірлікке үндеген мерекеде өңір басшысы Мемлекет басшысы Қасым-Жомарт Тоқаевтың құттықтау сөзін жеткізіп, Алғыс айту күні барлық қазақстандықтардың бір-біріне деген мейірімділік, достық пен құрметінің нышанына айналғанын атап өтті.

«Алғыс айту күні – елдің бірлігін нығайтып, татулығын тұғырлы ететін күн. Айтулы күні халқымыздың кең пейілі мен дархандығы дәріптеледі. Осы сәтті пайдаланып, Сіздерді Қазақстан халқы Ассамблеясының құрылғанына 30 жыл толуымен де шын жүректен құттықтаймын! Қазіргі таңда өңірде 50-ден аса этностың өкілдері тату-тәтті өмір сүруде. Облысымызда ел бірлігін нығайтатын, берекеге бастайтын жұмыстар атқарылуда. Елімізде жақсылық пен жомарттық салтанат құрып, алғыс айтар істеріміз көп болсын!» деді Нұралхан Көшеров.

Іс-шара барысында қонақтар Ассамблеяның 30 жылдығына арналған облыстық этномәдени бірлестіктердің қолөнер көрмесін тамашалады.

Бірлік пен тaтулықты паш еткен мереке мәдениет саласының және этномәдени бірлестіктер өнерпаздарының концерттік бағдарламасына ұласты. Этнос өкілдері қазақ ақындарының өлеңдерін оқып, отаншылдықққа шақыратын поэзия жауһарларынан шашу шашты.

Түркістан облысы әкімінің баспасөз қызметі