НҰРАЛХАН КӨШЕРОВ ОБЛЫС ТҰРҒЫНДАРЫН ЖЕКЕ ҚАБЫЛДАДЫ

Бүгін Түркістан облысының әкімі Нұралхан Көшеров кезекті рет жергілікті тұрғындарды жеке қабылдады. Арыз-талаптары мен ұсыныстарын тыңдап, жауапты тұлғалармен бірге оңтайлы шешу жолдарын қарастырды.

Қабылдау барысында Сайрам, Сауран, Бәйдібек аудандары мен Арыс қаласының азаматтары бірқатар мәселе көтеріп, облыс әкімінің көмегіне жүгінді. Нақтырақ айтқанда, тұрғындар карьер, білім саласындағы заңсыздықтар, мектептердің құрылыс сапасы, жұмыстан заңсыз босатылу, полигон сияқты түйткілдерді ортаға салды.

«Тұрғындардың пікірі біз үшін маңызды. Ешбір өтініш елеусіз қалмайды. Көтерілген мәселелер жіті зерделеніп, заң аясында шешімін табады» деген облыс әкімі жауапты тұлғаларға нақты тапсырмалар жүктеп, орындалу барысын өз бақылауына алатынан айтты.

Одан бөлек, қабылдауға келген азаматтар шетелдік инвесторлар есебінен жекеменшік аурухана және зауыт салу жобасын таныстырып, жергілікті әкімдік тарапынан қолдау көрсетуді сұрады. Сонымен қатар өзге салалар бойынша дайын жобаларды жүзеге асыруға да инвесторлар бар екенін жеткізді. Нұралхан Көшеров жаңа инвест-жобаларды жүзеге асыруға кедергі жоқ екенін айтып, жер және инфрақұрылым мәселелерін шешуге көмек көрсетілетінін жеткізді.

Айта кетейік, Түркістан облысының әкімі мен оның орынбасарлары бекітілген кестеге сәйкес жеке қабылдау өткізуде. Жеке қабылдауға «Eotinish» бірыңғай базасы арқылы немесе «Ашық әкімдік» кеңсесіне келіп, жазылуға болады.

Түркістан облысы әкімінің баспасөз қызметі