ТҮРКІСТАН: ЖАСТАР ТАҒЛЫМ АЛҒАН ТАЗАЛЫҚ НАУҚАНЫ

«AMANAT» партиясының «Таза бейсенбі» апталығы аясында партияның Қазығұрт аудандық филиалының жанындағы «Жастар рухы» жастар қанатының белсенділері аудандық «Жастар ресурстық орталығының» еріктілер тобымен бірлесіп, Қарабау ауылдық округі, Сынтас елді мекеніде 99 жасқа келген Ұлы Отан соғысының ардагері Анарбай Мырзахметовтың үй ауласын қардан тазалау жұмыстарын жүргізді, бау-бақшасын ретке келтірді.

Ұлы Жеңістің 80 жылдығы қарсаңында өткізіліп отырған іс-шара партияның «Ардагерлерді ардақтайық» жобасымен үйлестіріліп, жастарды аға бунның қаһармандық рухына тағзым етуге шақырып, олардың ерлік ұасиетін қадір тұтуға тәрбиелейді. Жастар бастамашыл болған іс-шараға Қазығұрт аудандық мәслихатының төрағасы Тайбек Қалымбетов, партияның аудандық филиалының төрағасы Есімхан Исақұлов, аудандық мәслихат депутаты, партиялық фракция мүшесі Мейіржан Шаржанов қолдауын білдіріп, ел қазынасына баланған қарияның шаңырағына арнайы келіп, тұрмыс жағдайымен танысты.

Анарбай ақсақал жас буынның өнегелі ісіне шын көңілден риза болып, ақ батасын берді, елімізге амандық тіледі. Бірінші Белорусь майданында соғыс қимылдарына қатысқан ақсақал Польша, Германия жерлерін фашистік армиядан азат ету шайқастарына қатысқан. Соғыс жылдарында көрсеткен ерлігі үшін «Берлинді алғаны үшін», «Германияны жеңгені үшін» медальдарымен наградталған. Жеті қыз, үш ұл өсіріп, жетілдірген қария бүгінде 48 немере, 92 шөбере, 3 шөпшек көріп, ұрпағының қызықшылығын көріп отыр. «Таза бейсенбі» науқанына қатысқан жастарымыз ақсақалға жан саулығын тілеп, өнегелі отбасының тағлымды тіршілігінің өміршең болуына ниеттес екендіктерін жеткізді.