ТҮРКІСТАНДА ИНВЕСТИЦИЯЛЫҚ ЖОБАЛАРДЫ ІСКЕ АСЫРУ ҚАРҚЫНЫ КҮШЕЙТІЛЕДІ

Мемлекет басшысы Қасым-Жомарт Тоқаев өңірлердің экономикалық әлеуетін арттыру, инвестиция тарту, өндіріс орындарын ашу және жаңа жұмыс орындарын құру бағытындағы міндеттерді тұрақты түрде айқындап келеді. Президент тапсырмасына сәйкес Түркістан облысында инвестициялық жобаларды сапалы әрі мерзімінде іске асыруға ерекше басымдық берілген. Осы бағыттағы жұмыстар Түркістан облысының әкімі Нұралхан Көшеровтің төрағалығымен өткен мәжілісте кеңінен талқыланды. Жиында өңірде жүзеге асырылып жатқан инвестициялық жобалардың орындалу барысы сараланып, «TURAN» арнайы экономикалық аймағының бүгінгі жұмысы мен алдағы даму жоспарлары қаралды. Облыс әкімі ең алдымен әрбір инвестициялық жобаның өңір экономикасы үшін маңызы зор екенін атап өтіп, жауапты басқарма басшыларына нақты талап қойды.

– Президент инвестиция тарту мен өндірісті дамытуға ерекше мән беріп отыр. Әрбір жоба – жаңа жұмыс орны, жаңа өндіріс, халықтың әл-ауқатын арттыруға қосылған үлес. Сондықтан бірде-бір жоба қағаз жүзінде қалып қоймауы тиіс. Құрылысы тоқтап тұрған немесе мерзімінен кешігіп жатқан жобалар бойынша нақты шешім қабылдау қажет. Егер инвестор өзіне алған міндеттемесін орындай алмаса, заң талаптарына сәйкес жер телімін мемлекетке қайтарып, оны жұмыс істеуге дайын басқа инвесторларға беру керек. Құрылыс созылмауы тиіс. Әр жоба маңызды, бірақ оның толық әрі уақытылы жүзеге асырылуы одан да маңызды, – деді Нұралхан Көшеров.

Мәжілісте облыстық өнеркәсіп және индустриялық-инновациялық даму басқармасының басшылығы «TURAN» арнайы экономикалық аймағының қызметі туралы баяндама жасады. Жалпы аумағы 3603,3 гектарды құрайтын алаң әкімшілік-іскерлік, тарихи-мәдени және өнеркәсіптік бағыттағы бірнеше қосалқы аймақтан тұрады. 2019 жылдан бері жалпы құны 1 триллион 263 миллиард теңгені құрайтын 140 инвестициялық жоба тіркелген. Оларды жүзеге асыру нәтижесінде 13 мыңнан астам жаңа жұмыс орнын құру жоспарланған. Қазіргі таңда 58 жоба іске асырылып, 3243 тұрақты жұмыс орны ашылды.

Биыл Үкіметтің тиісті қаулысына сәйкес арнайы экономикалық аймақтың аумағы оңтайландырылып, әкімшілік-іскерлік және тарихи аймақтардың бір бөлігі қысқартылды. Соның есебінен пайдаланылмай жатқан бірқатар аумақ жалпы қолданысқа қайтарылып, Түркістан қаласының жер және мүлік салығы бойынша бюджет кірісі жыл сайын шамамен 657,7 миллион теңгеге ұлғаяды.

Жиында әкімшілік-іскерлік аймақта құрылыс жұмыстары баяулаған бірқатар инвестициялық жобалар жеке қаралды. Қазіргі таңда тұрғын үй және коммерциялық нысандарды қамтитын 8 жобада құрылыс жұмыстары белгіленген кестеден кешігуде. Басқарушы компания тарапынан бірнеше мәрте ескерту актілері толтырылып, қала прокуратурасына жолданған.

Облыс әкімі жауапты мекемелерге әрбір жоба бойынша нақты іс-қимыл алгоритмін әзірлеуді тапсырды.

Сонымен қатар Түркістан қаласындағы 290 гектарлық өнеркәсіптік аймақта жалпы құны 157 миллиард теңгені құрайтын 14 жоба тіркелген. Оның алтауы іске қосылса, бірнеше жобада құрылыс жүргізілуде. 365 гектарлық Сауран индустриялық аймағында құны 86,9 миллиард теңгені құрайтын 8 инвестициялық жоба жүзеге асырылуда. Мұнда негізгі мәселе – электр қосалқы станциясының құрылысын аяқтау және қажетті инфрақұрылымды толық қамтамасыз ету.

Кентау қаласындағы өнеркәсіптік аймақта жеті жобаның бесеуі іске қосылып, қалған екеуінде өндірістік дайындық жұмыстары жүргізілуде. Ал «Орталық Азия» халықаралық өнеркәсіптік кооперация орталығында жалпы құны 102,1 миллиард теңгені құрайтын бес жоба тіркелген. Бұл аумақта инженерлік инфрақұрылым құрылысының барысы негізгі мәселе ретінде көтерілді.

Сондай-ақ Сайрам және Отырар аудандарындағы индустриялық аймақтардың жай-күйі талданып, қажетті инфрақұрылымды дамыту мен жер мәселелерін шешу бойынша нақты тапсырмалар берілді.

Жиын барысында «TURAN» арнайы экономикалық аймағын одан әрі дамытуға бағытталған жаңа бастамалар да таныстырылды. Атап айтқанда, аймақ аумағын 27,5 гектарға кеңейту, өнеркәсіптік аймақтарды толық абаттандыру, қоршау, бейнебақылау жүйелерін орнату, қатысушылардың жауапкершілігін күшейту үшін нормативтік-құқықтық актілерге өзгерістер енгізу ұсынылды.

Жиынды қорытындылаған Нұралхан Көшеров Мемлекет басшысы жүктеген міндеттерді сапалы орындау – әрбір мемлекеттік орган мен инвестордың ортақ жауапкершілігі екенін атап өтті.

Түркістан облысы әкімінің баспасөз қызметі