ТҮРКІСТАН: ҚАЗЫҒҰРТ АУДАНЫНДА «ТАЗА ҚАЗАҚСТАН» БАҒДАРЛАМАСЫ АЯСЫНДА 5 МЫҢНАН АСА АҒАШ ЕГІЛДІ

Қазығұрт ауданында «Таза Қазақстан» бағдарламасы аясында жалпыхалықтық сенбілік ұйымдастырылып, тазалық шараларымен қатар, тұрғындар арасында экологиялық мәдениетті қалыптастыру және аудан аумағын көгалдандыру мақсатында күзгі ағаш отырғызу акциясы өтті.

Тазалық шарасына аудан әкімі Азизхан Исмаилов, зиялы қауым өкілдері, ерікті жастар, мемлекеттік қызметкерлер мен тұрғындар белсенді қатысты. Қатысушылар табиғатты қорғау және экологиялық сананы қалыптастыру бағытында өз үлестерін қосып, бірлесе тал отырғызды.

Акция барысында аудан басшысы ауданның экологиялық тепе-теңдігін сақтау мен тұрғындардың табиғатқа деген жанашыр көзқарасын қалыптастырудың маңыздылығын атап өтті. Сонымен қатар аудан тұрғындарын «Таза Қазақстан» бағдарламасы секілді экологиялық бастамаларды қолдауға және қоршаған ортаға ұқыпты қарауға шақырды.

Бір күндік акция аясында аудан орталығы мен ауылдық округтерін қоса алғанда 5000 түп қарағаш және 25 түп терек ағашы егілді. Жалпы шараға 1500-ге жуық адам қатысып, туған өлкенің экологиялық ахуалын жақсартуға өз үлесін қосты.

Түркістан облысы әкімінің баспасөз қызметі