ТҮРКІСТАНДА «ЮЖНЫЙ КАЗАХСТАН» ГАЗЕТІНІҢ 100 ЖЫЛДЫҚ МЕРЕЙТОЙЫ АТАЛЫП ӨТТІ

Түркістан төрінде «Южный Казахстан: 100 жыл оқырманмен бірге» атты салтанатты іс-шарасы өтті. Өңірлік басылымның ғасырлық тарихын айқындайтын маңызды шараға облыс әкімі Нұралхан Көшеров, облыстық мәслихат төрағасы Нұралы Әбішов, ҚР Мәжілісінің депутаты Сергей Пономарев, жергілікті атқарушы орган өкілдері, өңірлік және республикалық БАҚ өкілдері, журналистика ардагерлері қатысты.

Салтанатты жиында Түркістан облысы әкімі Нұралхан Көшеров газеттің мерейтойымен құттықтап, редакция ұжымына қызметтік автокөлік кілтін табыстады.

– Баршаңызды облыста өзіндік орны бар «Южный Казахстан» газетінің 100 жылдық мерейтойымен шын жүректен құттықтаймын! Газет – қоғамның үні, халық пен билік арасындағы алтын көпір. Сондықтан бүгінгі іс-шараның маңызы зор деп ойлаймын. Бұл басылым әрдайым уақыт рухын бейнелеп келеді. Оның беттерінде – өңірдің тарихы, адамдардың тағдыры мен мәдени жетістіктері көрініс тапқан. Түркістан облысында журналистиканың бай дәстүрі қалыптасқан. Оңтүстік өлке әрқашан өз белсенділігімен, энергиясымен және жасампаз рухымен ерекшеленеді. Бұл жерде өмір қайнап жатыр. Мемлекеттік бағдарламалар жүзеге асуда, жаңа идеялар мен жобалар дүниеге келуде. Редакция ұжымына мықты денсаулық, шығармашылық қуат тілеймін! – деген облыс әкімі редакция ұжымына қызметтік автокөлік кілтін табыс етті.

Жиын барысында ресми тұлғалардың, серіктестер мен баспасөз өкілдері сөз сөйлеп, қазіргі журналистиканың өзекті мәселелері, өңірлік БАҚ-тың рөлі және цифрлық дәуірдегі газет жанрының маңызы туралы ойлар айтылды. Сондай-ақ журналистика ардагерлеріне ерекше құрмет көрсетілді. Музыкалық нөмір орындалып, «Редакция өмірінің бір күні» атты деректі фильмнің көрсетілімі өтті.

Салтанатты кеште «Ветер перемен» атты жаңа кітаптың тұсауы кесілді. Бұл кітапта редакцияның мерейтойлық жылдағы өмірі, журналистердің тағдыры мен газеттің ғасырлар тоғысындағы жолы баяндалған. Газеттің бас редакторы Марина Анатольевна Лимаренко кітапты арнайы таныстырып, оқырманмен пікір алмасты.

Түркістан облысы әкімінің баспасөз қызметі